काठमाडौं। प्रधानमन्त्री दैवी प्रकोप राहत कोषमा कुल ११ अर्ब ९५ करोड १७ लाख रुपैयाँ मौज्दात रहेको छ।

प्रधानमन्त्री तथा मन्त्रिपरिषद्को कार्यालयका अनुसार मंगलबार साँझ ५ बजेसम्म कोषका नौवटा रुपैयाँ खातामा ८ अर्ब ७६ करोड ६९ लाख रुपैयाँ र दुईवटा डलर खातामा २ करोड ११ लाख ८ हजार ४७१ अमेरिकी डलर मौज्दात छ। डलरलाई प्रतिअमेरिकी डलर १५० रुपैयाँ ८८ पैसाका दरले हिसाब गर्दा कोषमा उक्त रकम जम्मा भएको हो।

रसुवा र भोटेकोशीमा आएको बाढीपछि कोषमा ७ अर्ब ६८ करोड ४४ लाख रुपैयाँ र २ करोड ५ लाख २२ हजार ४२३ अमेरिकी डलर संकलन भएको छ। यो विपद्अघि कोषमा रहेको २ अर्ब ८ करोड २४ लाख रुपैयाँ मौज्दातभन्दा बाहेकको रकम हो। भदौ २३ गते मात्र कोषमा ३० करोड ६२ लाख रुपैयाँ र १ लाख १२ हजार ३२ अमेरिकी डलर प्राप्त भएको कार्यालयले जनाएको छ।

सरकारले राहत तथा उद्धार कार्यका लागि भदौ १६ गते राष्ट्रिय विपद् जोखिम न्यूनीकरण तथा व्यवस्थापन प्राधिकरणलाई कोषबाट १ अर्ब रुपैयाँ हस्तान्तरण गरिसकेको छ।

अर्थ मन्त्रालयले विपद् प्रभावितका लागि सहयोग गर्ने स्वदेश तथा विदेशका व्यक्ति र संस्थाप्रति आभार व्यक्त गरेको छ। मन्त्रालयले सहयोगका लागि आधिकारिक पोर्टल donate.gov.np प्रयोग गर्न आग्रह गरेको छ।