काठमाडौं। राष्ट्रिय निजी तथा आवासीय विद्यालय एसोसिएसन नेपाल (नेसनल प्याब्सन) ले रसुवा, नुवाकोट र धादिङका बाढीपीडितको राहत तथा पुनःस्थापनाका लागि सरकारलाई एक करोड रुपैयाँ सहयोग गरेको छ।
नेसनल प्याब्सनका अध्यक्ष सुभाष न्यौपानेको नेतृत्वमा आज उक्त सहयोग रकम अर्थमन्त्री स्वर्णिम वाग्लेलाई हस्तान्तरण गरिएको हो। सो रकम प्रधानमन्त्री दैवी प्रकोप उद्धार कोषमा जम्मा गरिनेछ। विपद्बाट प्रभावित नागरिकलाई सहयोग पुर्याउने उद्देश्यले संस्थागत पहलमा उक्त रकम जुटाइएको नेसनल प्याब्सनले जनाएको छ।
नेसनल प्याब्सनका अनुसार संस्थागत सहयोगका अतिरिक्त देशभरका सदस्य विद्यालय तथा विभिन्न संस्थाहरूले पनि आ-आफ्नो तर्फबाट राहतका लागि करोडौँ रुपैयाँ बराबरको सहयोग संकलन गरेका छन्। बाढी र विपद्को कठिन परिस्थितिमा पीडित नागरिकप्रति ऐक्यबद्धता जनाउँदै सामाजिक उत्तरदायित्वअन्तर्गत उक्त सहयोग प्रदान गरिएको संस्थाले स्पष्ट पारेको छ।
रसुवा, नुवाकोट र धादिङमा आएको बाढीबाट ठूलो जनधनको क्षति भएपछि विभिन्न संघसंस्था, निजी क्षेत्र तथा सामाजिक संस्थाहरूले राहत, उद्धार र पुनःस्थापनाका लागि निरन्तर सहयोग गर्दै आएका छन्।
