काठमाडौं। रसुवाको भोटेकोशी नदीमा आएको बाढीबाट प्रभावित नागरिकको उद्धार, राहत र पुनःस्थापनाका लागि एनसेल आजियाटा लिमिटेडका कर्मचारीहरूले रु ३३ लाख ५० हजार सहयोग गरेका छन्। कर्मचारीहरूले स्वेच्छिक रूपमा संकलन गरेको उक्त रकम प्रधानमन्त्री दैवी प्रकोप उद्धार कोषमा जम्मा गरिएको छ।
एनसेल आजियाटा लिमिटेडका चिफ रेगुलेटरी एन्ड कर्पोरेट सर्भिसेज अफिसर डिल्लीराम श्रेष्ठले उक्त सहयोग रकम जम्मा गरिएको रसिद सूचना तथा सञ्चारमन्त्री डा विक्रम तिमिल्सिनालाई हस्तान्तरण गरेका हुन्। हस्तान्तरण कार्यक्रममा नेपाल दूरसञ्चार प्राधिकरणका अध्यक्ष अर्जुन घिमिरेको पनि उपस्थिति रहेको थियो।
भोटेकोशीमा आएको बाढीका कारण रसुवा, नुवाकोट, धादिङ र चितवनका विभिन्न क्षेत्रमा जनधन तथा भौतिक पूर्वाधारमा ठूलो क्षति पुगेको छ। बाढी प्रभावितहरूको सहयोगका लागि सरकारी तथा गैरसरकारी क्षेत्रबाट राहत जुटाउने काम भइरहेको छ। यसअघि एनसेल आजियाटा लिमिटेडले संस्थागत रूपमा प्रधानमन्त्री दैवी प्रकोप उद्धार कोषमा रु एक करोड सहयोग गरिसकेको छ।
