काठमाडौं। कृषि, वन तथा पर्यावरण मन्त्री गिता चौधरीले चीनसँगको सीमा जोडिएको कोरला नाकाको स्थलगत निरीक्षण गरेकी छिन्। बुधबार गरिएको उक्त निरीक्षणका क्रममा मन्त्री चौधरीले नाकाबाट हुने कृषि तथा पशुजन्य वस्तुको आयात-निर्यातको अवस्था र त्यसका लागि आवश्यक पूर्वाधारबारे जानकारी लिएको उनको सचिवालयले जनाएको छ।
निरीक्षणका क्रममा मन्त्री चौधरीले स्थानीय कृषि उपजको व्यापारलाई थप व्यवस्थित र प्रभावकारी बनाउने विषयमा चासो राखेकी थिइन्। उनले नाकामा कृषि तथा पशुजन्य वस्तुको व्यापारमा देखिएका समस्या पहिचान गरी सहजीकरण गर्न सम्बन्धित निकायलाई निर्देशन दिएकी छिन्।
विशेषगरी मुस्ताङको महत्त्वपूर्ण पशुजन्य व्यापारका रूपमा रहेको च्याङ्ग्राको ओसारपसारलाई सहज बनाउन क्वारेन्टाइनसम्बन्धी व्यवस्थामा ध्यान दिनुपर्ने उनको भनाइ छ। मन्त्री चौधरीले च्याङ्ग्रा व्यापारमा अनावश्यक झन्झट नहुने गरी स्वास्थ्य तथा पशु सुरक्षा मापदण्ड कायम राख्दै प्रक्रियालाई प्रभावकारी बनाउनुपर्नेमा जोड दिइन्।
उनले सीमा नाकामा रहेका कार्यालयहरूबीच प्रभावकारी समन्वय आवश्यक रहेको बताउँदै स्थानीय व्यवसायी तथा कृषकले सहज रूपमा व्यापार गर्न सक्ने वातावरण निर्माण गर्न मन्त्रालयले पहल गर्ने प्रतिबद्धता जनाइन्। सो अवसरमा गण्डकी प्रदेशका वन तथा वातावरणमन्त्री नम्डु गुरुङ र सङ्घीय सांसद योगेश गौचन थकालीलगायतको उपस्थिति रहेको थियो।
