काठमाडौँ- चिसो मौसम बढेसँगै बजारमा खाना पकाउने एलपी ग्यासको खपत क्रमशः बढ्न थालेको छ । एलपी ग्यास उद्योग सङ्घ नेपालका अध्यक्ष कृष्णभक्त श्रेष्ठले चिसोमा ग्यासको खपत बढेको जानकारी दिनुभयो । अन्य सिजनको तुलनामा जाडोयाममा पाँच देखि १० प्रतिशत ग्यासको खपत बढेको उहाँले जानकारी दिनुभयो ।
तीन/चार वर्षअघि जाडोयाम ग्यासको खपत १५ देखि २० प्रतिशतसम्म बढ्ने गरेको श्रेष्ठले बताउनुभयो । “विगतका वर्ष जस्तो यस पटक धेरै नबढे पनि जाडोयामसँगै खपत केही बढेको छ ।” औद्योगिक क्षेत्र पूर्ण रूपमा सञ्चालन हुन नसक्दा ग्यासको खपत विगतको जस्तो आकारमा भने नबढेको उहाँको भनाइ छ । चिसो मौसममा खाना पकाउनुका साथै ग्यास गिजरको प्रयोगले पनि यसको खपत बढ्ने गर्छ ।
ग्यासभन्दा बिजुली सस्तो पर्ने हुँदा विद्युतीय चुलोको प्रयोग बढ्दै छ तर बिजुली जाने समस्याले ग्यासको घरायसी खपत घटेको छैन । नेपाल आयल निगमका अनुसार बजारमा ग्यासको आयात नियमित आयात भइरहेकाले छ ।
आपूर्ति नियमित भइरहेकाले पर्याप्त मात्रामा ग्यासको मौज्दात रहेको व्यवसायीको भनाइ छ । ७० प्रतिशत ग्यास घरायसी र ३० प्रतिशत औद्योगिक प्रयोजनमा खपत हुने गर्छ । होटेल तथा रेस्टुरेन्ट सुस्त गतिमा चल्दा ग्यासको खपत स्वाभाविक रूपमा नबढेको व्यवसायी बताउँछन् । निगमले मासिक ४५ हजार मेट्रिक टन ग्यासको कोटा निर्धारण गरेको छ ।
भन्सार विभागको तथ्याङ्क अनुसार चालु आर्थिक वर्ष २०८२/८३ को चार महिनामा (साउन–कात्तिक) १८ अर्ब ८३ करोड ६१ लाख रुपियाँ बराबरको एक लाख ८२ हजार ११६ मेट्रिक टन ग्यास आयात भएको छ । सङ्घका अनुसार बजारमा एक करोड ५७ लाख थान सिलिन्डर रहेका छन् ।
निगमले ग्यासको खरिद आदेश जारी गरेपछि ग्यास उद्योगीले इन्डियन आयल कर्पोरेसन्स (आइओसी) को बरौनी, दुर्गापुर, पारादीप, हल्दिया, मथुरा रिफाइनरीबाट ग्यास आयात गर्ने गर्छन् ।
५९ वटा ग्यास उद्योगले भारतका विभिन्न रिफाइनरी केन्द्रमा गएर ग्यास ल्याएर नेपालमा वितरण गर्दै आएका छन् । ग्यासको ढुवानी भने भारतीय ट्रान्सपोर्टरमार्फत हुने गर्छ । निजी क्षेत्रसँग आठ हजार मेट्रिक टन ग्यासको भण्डारण क्षमता रहे पनि निगमसँग ग्यासको भण्डारण छैन । जसको कारणले नियमित रूपमा बजारमा ग्यासको आपूर्ति नभए अभाव हुने गर्छ ।
