काठमाडौं। राजधानीमा आगामी असोज १ देखि ४ गतेसम्म नवौँ नेपाल जग्गा तथा आवास एवं निर्माण प्रदर्शनी आयोजना हुने भएको छ
भृकुटीमण्डपमा सञ्चालन हुने उक्त एक्स्पोमा मध्यम वर्गलाई लक्षित गर्दै विभिन्न सहुलियत र सुलभ मूल्यका आवास योजना सार्वजनिक गरिने आयोजकले जनाएको छ।
एक्स्पोमा ७७ लाख ५० हजार रुपैयाँमै घर र जग्गा खरिद गर्न सकिने अफर राखिएको छ। साथै, जग्गा खरिदमा २५ प्रतिशतसम्म छुट र ५ हजार १ रुपैयाँमै टोकन बैना गर्न सकिने व्यवस्था गरिएको छ। यदि जग्गा चित्त नबुझेमा सो रकम फिर्ता हुने सुविधासमेत छ। यसबाहेक, काठमाडौं नजिकका नुवाकोट र रसुवा मोड क्षेत्रमा ३ बेडरुमसहितको दुईतले घर करिब १ करोड ४० लाख रुपैयाँमा उपलब्ध गराउने अवधारणा पनि प्रस्तुत गरिएको छ।
नेपाल जग्गा तथा आवास विकास संघका अध्यक्ष दीपक कुँवरले धेरै परिमाणमा घर निर्माण गरी लागत घटाउने र कम नाफामा बिक्री गर्ने योजना रहेको बताए। प्रदर्शनीमा सहभागी उपभोक्ताले डेभलपरसँग प्रत्यक्ष संवाद गरी स्थान, मूल्य र भुक्तानी प्रक्रियाबारे जानकारी लिन सक्नेछन्। बैंक तथा वित्तीय संस्थाहरूको उपस्थिति रहने भएकाले आवासीय कर्जा र वित्तीय व्यवस्थापनसम्बन्धी परामर्शसमेत एउटै स्थानबाट प्राप्त हुनेछ।
नेपाल जग्गा तथा आवास विकास संघ र नेपाल जग्गा तथा आवास विकास महासंघको संयुक्त आयोजनामा हुन लागेको यो मेलामा निर्माण सामग्री, प्रविधि र इन्टेरियर डिजाइनका स्टलहरू पनि रहनेछन्।
नेपाल चेम्बर अफ कमर्सको ७५औँ हिरक जयन्तीको अवसरमा आयोजना गरिएको यस एक्स्पोलाई ‘पेपरलेस’ बनाउने लक्ष्य राखिएको छ। मेलामा ओम अस्पताल र ग्रान्डी इन्टरनेसनल हस्पिटलको सहकार्यमा निःशुल्क स्वास्थ्य शिविरसमेत सञ्चालन गरिनेछ।
