काठमाडौं। रोयल इन्फिल्डले नेपालमा हन्टर ३५० मोटरसाइकलको नयाँ भेरियन्ट सार्वजनिक गरेको छ। कम्पनीले टार्माक ब्ल्याक नामको नयाँ भेरियन्ट ल्याउनुका साथै टप भेरियन्टमा मुम्बई एल्लो र मुनसट ह्वाइट गरी दुई नयाँ रङ थपेको छ।
नयाँ टार्माक ब्ल्याक भेरियन्टमा एलोय ह्विल, राउन्ड ह्यालोजन हेडल्याम्प, डिजी-एनालग इन्स्ट्रुमेन्ट क्लस्टर, रोटरी स्विचगियर, स्टिच्ड सिट र स्पोर्टी ग्राब रेल जस्ता विशेषताहरू समावेश छन्। यो भेरियन्टमा सुरक्षाका लागि सिंगल च्यानल एबीएस र गियर परिवर्तन सहज बनाउन स्लिप एन्ड असिस्ट क्लच दिइएको छ।
कम्पनीका अनुसार मुम्बई एल्लो रङ मुम्बईको कला र जीवन्त शहरी वातावरणबाट प्रेरित छ भने मुनसट ह्वाइटमा ओरायन नक्षेत्रका ग्राफिक्स प्रयोग गरिएको छ। रोयल इन्फिल्डका चिफ कमर्सियल अफिसर यदविन्दर सिंह गुलरियाले नेपालका नयाँ पुस्ताका राइडरहरूमाझ हन्टर ३५० को लोकप्रियता बढ्दै गएको बताए। अल्फा अटोमोटिभका निर्देशक मेघराज पौडेलले नयाँ भेरियन्ट र रङले ग्राहकलाई थप विकल्प प्रदान गर्ने उल्लेख गरे।
नयाँ टार्माक ब्ल्याक भेरियन्टको मूल्य ४ लाख ८७ हजार रुपैयाँ तोकिएको छ। त्यस्तै, मुम्बई एल्लो र मुनसट ह्वाइट रङमा उपलब्ध टप भेरियन्टको मूल्य ५ लाख ११ हजार रुपैयाँ रहेको छ। यी मोटरसाइकलहरूको बुकिङ तथा बिक्री १६ सेप्टेम्बर २०२६ देखि नेपालभरका आधिकारिक डिलरमार्फत सुरु भएको छ।
