काठमाडौं। प्रधानमन्त्री दैवी प्रकोप उद्धार कोषमा पछिल्लो २४ घण्टामा करिब २३ करोड रुपैयाँ थपिएको छ। प्रधानमन्त्री तथा मन्त्रिपरिषद्को कार्यालयका अनुसार बुधबारको तुलनामा बिहीबार कोषमा २२ करोड ७५ लाख ३८ हजार ३३१ रुपैयाँ थपिएको हो।
बिहीबार साँझसम्म नौवटा बैंकमा रहेको मौज्दात रकम १० अर्ब ८९ करोड ६६ लाख ६२ हजार २७७ रुपैयाँ पुगेको छ। यसका साथै दुईवटा बैंकमा रहेको डलर खातामा दुई करोड ३९ लाख ३० हजार ७३१ अमेरिकी डलर जम्मा भएको छ। कार्यालयका अनुसार सबै खातामा गरी कुल मौज्दात १४ अर्ब ५६ करोड ३८ लाख सात हजार ५५६ रुपैयाँ पुगेको छ।
कोषबाट रसुवाको भोटेकोशी नदीमा आएको बाढीबाट पीडितहरूका लागि राष्ट्रिय विपद् जोखिम न्यूनीकरण तथा व्यवस्थापन प्राधिकरणमार्फत एक अर्ब रुपैयाँ निकासा भइसकेको छ। सरकारले बाढीप्रभावित परिवारको आवास भाडा र अन्य आवश्यक खर्चका लागि मासिक रकम उपलब्ध गराउने निर्णय गरेको छ। यसअनुसार चार सदस्यसम्मको परिवारलाई मासिक १५ हजार रुपैयाँ र थप प्रत्येक सदस्यका लागि थप दुई हजार रुपैयाँ उपलब्ध गराइनेछ।
