काठमाडौँ। रसुवाको भोटेकोशी नदीमा आएको विनाशकारी बाढी तथा पहिरोबाट प्रभावित नागरिकको राहत तथा उद्धार कार्यमा सहयोग पुर्याउने उद्देश्यले मोबाइल फोन आयातकर्ताहरूले ३१ लाख रुपैयाँ सहयोग गरेका छन्।
मोबाइल फोन आयातकर्ताहरूको संस्था मोबाइल फोन इम्पोर्टर्स एसोसिएसन (एमपीआईए) ले आफ्ना सदस्य संस्थाहरूबाट संकलन गरेको उक्त रकम बुधबार नेपाल सरकारका अर्थमन्त्रीलाई हस्तान्तरण गरेको हो।
एसोसिएसनका अनुसार संकलित रकम प्रधानमन्त्री दैवी प्रकोप उद्धार कोषमा जम्मा हुने गरी हस्तान्तरण गरिएको हो। बाढी तथा पहिरोबाट प्रभावित नागरिकको राहत, उद्धार तथा पुनःस्थापनाका कार्यमा रकम उपयोग हुने विश्वास एमपीआईएले व्यक्त गरेको छ।
संकलित रकम एमपीआईएका अध्यक्ष दीपककुमार मल्होत्रा, उपाध्यक्ष सञ्जय अग्रवाल तथा सञ्चालक सदस्यहरूले अर्थमन्त्रीलाई हस्तान्तरण गरे ।
एमपीआईएले विपद्को कठिन घडीमा प्रभावित नागरिकको साथमा उभिनु सबैको साझा दायित्व भएको जनाएको छ। सहयोग र सद्भावका लागि सदस्य संस्थाहरूलाई एसोसिएसनले धन्यवादसमेत व्यक्त गरेको छ।
