काठमाडौं। काठमाडौं जिल्ला प्रशासन कार्यालयले खाना पकाउने ग्यासको सहज आपूर्ति भइरहेको अवस्थामा पनि उपभोक्ताले पाउन नसकेको गुनासो बढेपछि कडा कदम चालेको छ।
प्रशासनले आज एक सूचना जारी गर्दै ग्यास बिक्रेता तथा वितरकहरूलाई उद्योग वा डिलरबाट ग्यास प्राप्त हुनासाथ उपभोक्तालाई बिक्री गर्न निर्देशन दिएको छ।
जिल्ला प्रशासन कार्यालयले बजारमा ग्यासको आपूर्ति र वितरणको अवस्थाबारे सघन अनुगमन सुरु गरिएको जनाएको छ।
तोकिएको मूल्यभन्दा बढी रकम लिने वा ग्यास भण्डारण गरी लुकाएर राख्ने बिक्रेतालाई प्रचलित कानुनबमोजिम कडा कारबाही गरिने प्रशासनले स्पष्ट पारेको छ। अनुगमनका क्रममा ग्यास लुकाएको फेला परेमा टोलीले नियन्त्रणमा लिई कारबाही प्रक्रिया अगाडि बढाउनेछ।
त्यसैगरी, प्रशासनले यस्ता शङ्कास्पद गतिविधिबारे जानकारी दिन आम उपभोक्तालाई आग्रह गरेको छ।
यदि कुनै बिक्रेताले ग्यासको स्टक लुकाएको वा बिक्री गर्न नमानेको पाइएमा तत्काल जिल्ला प्रशासन कार्यालयका सूचना अधिकारीको मोबाइल नम्बर ९८५१३३८३२२ मा सम्पर्क गर्न अनुरोध गरिएको छ।
