काठमाडौं। भदौ १० गते भोटेकोशी नदीमा आएको बाढीबाट प्रभावितका लागि धनकुटामा एक करोड १६ लाख ४८ हजार ६२७ रुपियाँ सहयोग रकम सङ्कलन भएको छ। स्थानीय तह, जनप्रतिनिधि, कर्मचारी, राजनीतिक दल, विद्यालय र स्थानीयवासीले उक्त रकम जुटाएका हुन्।
महालक्ष्मी नगरपालिकाले राहत र पुनःस्थापनाका लागि ४१ लाख ४८ हजार २२९ रुपियाँ सहयोग गर्ने निर्णय गरेको छ। नगर प्रमुख ध्रुवराज रायका अनुसार विपद् व्यवस्थापन कोष, जनप्रतिनिधि, कर्मचारी र शिक्षकको तलबबाट उक्त रकम जुटाइएको हो। त्यस्तै, पाख्रीबास नगरपालिकाले ३० लाख २३ हजार ६१४ रुपियाँ सहयोग गर्ने निर्णय गरेको नगर प्रमुख ज्ञानबहादुर गुरुङले जानकारी दिनुभयो। यसैगरी साँगुरीगढी गाउँपालिकाले पनि ३० लाख रुपियाँ सहयोग गर्ने भएको छ।
धनकुटाका अन्य चार स्थानीय तहले पनि सहयोगका लागि बैठकको तयारी गरिरहेका छन्। यसबाहेक प्याब्सनमा आबद्ध ११ संस्थागत विद्यालयले आठ लाख ७६ हजार २१ रुपियाँ, निर्माण व्यवसायी संघले एक लाख ११ हजार १११ रुपियाँ र नेपाली कांग्रेस धनकुटाले चार लाख १८ हजार ४३२ रुपियाँ सङ्कलन गरेको छ। स्थानीय बजारमा लाखे नाच प्रदर्शनबाट ७१ हजार २२० रुपियाँ सङ्कलन भएको छ। सङ्कलित सबै रकम प्रधानमन्त्री दैवी प्रकोप उद्धार कोषमा जम्मा गरिने भएको छ।
