काठमाडौं। पृथ्वी राजमार्गअन्तर्गत कृष्णभिरमा गएको पहिरोका कारण अवरुद्ध सडक खण्डमा सवारी साधनको परीक्षण आवागमन सुरु गरिएको छ। सडक सञ्चालनमा ल्याउने कार्यको पहिलो चरणमा काठमाडौंबाट चितवनतर्फ करिब २० वटा सवारी साधन सफलतापूर्वक पार गराइएको छ।
यस परीक्षणका क्रममा एउटा बुलेट सवारीसहित अन्य सवारी साधनहरूलाई सुरक्षित रूपमा गन्तव्यतर्फ पठाइएको हो। त्यसैगरी, चितवनबाट काठमाडौंतर्फ आउँदै गरेको एउटा भारी सवारी साधनलाई पनि सुरक्षित रूपमा पार गराइएको छ।
हाल प्राविधिक तथा उद्धार टोलीहरू पहिरो पन्छाएर सडकलाई दुवैतर्फबाट पूर्ण रूपमा सञ्चालनमा ल्याउन तीव्र गतिमा खटिरहेका छन्। परीक्षण सफल भएसँगै सडकको अवस्था सामान्य बनाएर अन्य सवारी साधनका लागि पनि बाटो खुलाउने प्रयास भइरहेको छ।
