काठमाडौं। कालीमाटी फलफूल तथा तरकारी बजार विकास समितिले सोमबारका लागि तरकारी तथा फलफूलको नयाँ मूल्यसूची सार्वजनिक गरेको छ। आजको बजारमा डल्ले च्याउ, करेला, घिरौँला र भिन्डीसहितका केही तरकारीको मूल्य घटेको छ भने काउली र मुलाको मूल्यमा वृद्धि भएको छ।
समितिका अनुसार आज डल्ले च्याउ प्रतिकिलो ४७५ रुपैयाँ र करेला ५५ रुपैयाँमा कारोबार भइरहेको छ। हिजो डल्ले च्याउ ५७५ रुपैयाँ र करेला ६५ रुपैयाँमा बिक्री भएको थियो। त्यसैगरी, घिरौँला ४६ रुपैयाँ र भिन्डी ४५ रुपैयाँ कायम भएको छ।
अर्कोतर्फ, स्थानीय काउलीको मूल्य बढेर १११ रुपैयाँ र हाइब्रिड मुलाको मूल्य ४२ रुपैयाँ पुगेको छ। हिजो काउली ९९ रुपैयाँ र मुला ३६ रुपैयाँमा कारोबार भएको थियो।बजारमा ठूलो नेपाली गोलभेँडाको औसत मूल्य ७५ रुपैयाँ, भारतीय ठूलो गोलभेँडा ८५ रुपैयाँ र रातो आलुको मूल्य ५३ रुपैयाँ रहेको छ।
भारतीय सुकेको प्याज ९० रुपैयाँ, लोकल बन्दा ३५ रुपैयाँ र लाम्चो भन्टा ३४ रुपैयाँ प्रतिकिलोका दरले किनबेच भइरहेको छ। केही तरकारीको मूल्य भने स्थिर रहेको समितिले जनाएको छ।
