काठमाडौँ। सरकारले चाडपर्व नजिकिँदै गर्दा बजारमा चिनीको अभाव हुने भन्दै सार्वजनिक भएका समाचारको खण्डन गरेको छ। वाणिज्य, आपूर्ति तथा उपभोक्ता संरक्षण विभागले उपत्यकामा चिनीको आपूर्ति सहज र पर्याप्त रहेको स्पष्ट पारेको छ।
विभागका अनुसार काठमाडौँ उपत्यकाका एक हजारभन्दा बढी बिक्री केन्द्रमा प्रतिकिलो ११० रुपैयाँका दरले चिनी बिक्री भइरहेको छ। उपभोक्ताले भाटभटेनी, बिगमार्ट र सेल्सबेरीलगायतका प्रमुख बिक्री केन्द्रबाट तोकिएको मूल्यमा चिनी खरिद गर्न सक्ने व्यवस्था मिलाइएको छ।
यसअघि भोटेकोशी नदीमा आएको बाढी, पृथ्वी राजमार्गको कृष्णभीर खण्डमा गएको पहिरो र भारतले चिनी निकासीमा लगाएको प्रतिबन्धलाई लिएर चिनी अभावको चर्चा चलेको थियो। यद्यपि, उद्योग, वाणिज्य तथा आपूर्ति मन्त्री दीपक साहको अध्यक्षतामा भदौ ३० गते बसेको सरोकारवालाको बैठकले बजार व्यवस्थापनबारे छलफल गर्दै आपूर्तिमा कुनै समस्या नरहेको निष्कर्ष निकालेको थियो।
विभागले उपभोक्तालाई आवश्यकताभन्दा बढी चिनी सञ्चय नगर्न आग्रह गरेको छ। चाडपर्वको समयमा माग बढे पनि आपूर्ति व्यवस्थापन चुस्त रहेकाले उपभोक्ताले अनावश्यक रूपमा चिनी थुपारेर राख्नुपर्ने अवस्था नरहेको विभागले जनाएको छ।
