सुनसरी। सुनसरीका किसानहरू पछिल्लो एक महिनादेखि जुट काट्ने, प्रशोधन गर्ने र बिक्री गर्ने काममा व्यस्त छन् । तराई क्षेत्रको तातो र आर्द्र हावापानीमा हुने यो नगदे बालीका लागि साउन र भदौ महिना कटाइको समय हो ।
कृषि ज्ञान केन्द्र सुनसरीका अनुसार यस वर्ष जिल्लाको १ हजार ३३४ हेक्टर जमिनमा जुट खेती गरिएको छ । यसबाट २ हजार ८१ मेट्रिक टन उत्पादन भएको छ, जुन गत वर्षको तुलनामा बढी हो । गत वर्ष १ हजार ३०८ हेक्टरमा २ हजार १० मेट्रिक टन जुट उत्पादन भएको थियो ।
भोक्राहा नरसिंह गाउँपालिकाका किसान रसिद मियाँका अनुसार जुट काटेपछि १५ दिनसम्म पानीमा डुबाएर राख्नुपर्छ । त्यसपछि मात्र जुट र सन्ठी केलाउन सकिन्छ । स्थानीय किसानहरूले ५ देखि १४ कट्ठासम्म जमिनमा जुट लगाएका छन् । जुटको बजार मूल्य ४० केजीको ६ हजार रुपियाँ रहेको छ र व्यापारीहरू घरमै आएर जुट खरिद गर्ने गर्दछन् ।
यद्यपि, खेतीमा लगानी पनि उत्तिकै रहेको किसान बताउँछन् । रञ्जित मेहताका अनुसार पाँच कट्ठा जमिनमा जुट लगाउँदा ५० हजार रुपियाँसम्म खर्च हुन्छ, जसमा मजदुरको ज्याला र खाना खर्च समावेश छ ।
सुनसरीमा भोक्राहा नरसिंह, कोसी, हरिनगर, गढी, बर्जु र देवानगन्ज गाउँपालिकाका साथै दुहवी र इनरुवा नगरपालिकामा जुट खेती बढी हुने गरेको छ । जुट उद्योगीहरूका अनुसार स्थानीय उत्पादनले मात्र माग धान्न नसक्दा भारत र बंगलादेशबाट जुट आयात गर्नुपर्ने बाध्यता छ । कृषि ज्ञान केन्द्रका सूचना अधिकृत प्रवीण श्रेष्ठका अनुसार मूल्यमा सुधार आए किसानहरूले खेतीको क्षेत्रफल बढाउने र केही वर्षमै देश आत्मनिर्भर हुन सक्ने सम्भावना छ ।
