बुटवल- लगातार तीन दिनदेखिको अविरल वर्षाका कारण आएको बाढी र पहिरोले लुम्बिनी प्रदेशका १८ वटा सडकखण्ड पूर्ण रूपमा अवरुद्ध भएका छन्। नेपाल प्रहरी राजमार्ग सुरक्षा तथा ट्राफिक व्यवस्थापन कार्यालय बुटवलले असोज ११ गते बिहान सार्वजनिक गरेको विवरणअनुसार पाल्पा, गुल्मी, प्युठान, रोल्पा र अर्घाखाँचीका सडक यातायात प्रभावित बनेका हुन्।
प्रहरीका अनुसार गुल्मीमा सात, पाल्पामा पाँच, प्युठानमा तीन, रोल्पामा दुई र अर्घाखाँचीमा एक सडकखण्ड बन्द रहेका छन्। गुल्मीमा कालीगण्डकी करिडोरको राक्से, रुद्रबेनी-वामीटक्सार सडकको सिस्नेभिर, मदन भण्डारी सहायक राजमार्गको शृङ्गा देउराली, तम्घास-रिडी सडकको सिमिचौर, रिडी-वामीटक्सार सडकको सोता, गुल्मी-स्याङ्जा सडकको हर्मीचौर र पुर्तिघाट सडकखण्ड अवरुद्ध छन्।
त्यस्तै पाल्पामा रामपुर-आर्यभञ्ज्याङ, रामपुर नगरपालिका-१ को कालीगण्डकी करिडोर, सिद्धार्थ राजमार्गको तिनाउ-५ र तानसेन क्षेत्र तथा रम्भा गाउँपालिका-१ को सडकखण्ड बन्द छन्। प्युठानमा बाग्दुला-बाहाने, बाहाने-खवाङ र भालुवाङ-प्युठान सडकखण्ड अवरुद्ध भएका छन् भने रोल्पामा शहीदमार्गको ललामाडा र घोराही-होलेरी सडकको बाहुनकुने क्षेत्र बन्द छन्। अर्घाखाँचीको गोरुसिङ्गे-अर्घाखाँची सडकअन्तर्गत शितगंगा-४ ठाडामा पनि यातायात अवरुद्ध भएको छ।
केही स्थानमा सडक खुलाउने प्रयास भइरहे पनि निरन्तरको वर्षाका कारण काममा कठिनाइ भइरहेको प्रहरीले जनाएको छ। पहाडी क्षेत्रमा थप पहिरोको जोखिम रहेकाले अत्यावश्यक बाहेक यात्रा नगर्न र यात्रा गर्नुपरे सम्बन्धित सुरक्षा निकायबाट सडकको अवस्था बुझेर मात्र निस्कन प्रहरीले सर्वसाधारणलाई आग्रह गरेको छ।
