सल्यान। सल्यानको कपुरकोटबाट चार महिनाको अवधिमा साढे २३ करोड रुपियाँभन्दा बढीको ताजा तरकारी तथा फलफूल निर्यात भएको छ।
कपुरकोट गाउँपालिकाबाट जेठदेखि भदौसम्म २३ करोड ६९ लाख चार हजार १७५ रुपियाँ बराबरको कृषि उपज बाहिरी जिल्लामा निकासी भएको हो।
कृषि उपज बजार केन्द्र कपुरकोटका अनुसार सो अवधिमा ५७ लाख ५६ हजार २६६ किलो ताजा तरकारी, ६४ हजार ८१० किलो अदुवा र २५ हजार ९२५ किलो फलफूल किसानले बिक्री गरेका छन्।
बजार केन्द्रका अध्यक्ष तिलक शर्माका अनुसार जेठदेखि कात्तिक-मङ्सिरसम्म चल्ने मुख्य सिजनमा कपुरकोट र यसका सहायक सङ्कलन केन्द्रबाट वार्षिक करोडौँ रुपियाँको कृषि उपज निर्यात हुने गरेको छ।
निकासी भएका कृषि उपजमध्ये सबैभन्दा ठुलो हिस्सा बेमौसमी टमाटरको छ। चार महिनामा ३२ लाख ४८ हजार ७३५ किलो टमाटर निकासीबाट ११ करोड ४१ लाख १३ हजार १२ रुपियाँ आम्दानी भएको छ। त्यसै गरी सात लाख ६९ हजार ३१२ किलो काउली बिक्रीबाट तीन करोड ९५ लाख नौ हजार ५१३ रुपियाँ किसानले प्राप्त गरेका छन्।
