हेटौंडा । अविरल वर्षाका कारण काठमाडौं जोड्ने मुख्य सडक अवरुद्ध भएपछि त्रिभुवन राजपथ फेरि राजधानी आवतजावतको प्रमुख वैकल्पिक मार्ग बनेको छ ।
पृथ्वी राजमार्ग र कान्ति राजमार्ग अवरुद्ध भएपछि त्रिभुवन राजपथमा सवारीको चाप बढेको छ । चाप व्यवस्थापन गर्न जिल्ला प्रशासन कार्यालय मकवानपुरले आइतबारदेखि सवारी सञ्चालनका लागि नयाँ समयतालिका लागू गरेको छ ।
तालिकाअनुसार हेटौंडाबाट काठमाडौं जाने र काठमाडौंबाट हेटौंडा आउने सवारीलाई छुट्टाछुट्टै समयमा सञ्चालन गरिनेछ । प्रमुख जिल्ला अधिकारी वसन्त अधिकारीका अनुसार साँघुरो सडकमा एकैपटक धेरै सवारी प्रवेश गर्दा जाम र दुर्घटनाको जोखिम बढ्ने भएकाले समय निर्धारण गरिएको हो ।
प्रशासनले इन्धन र खाना पकाउने एलपी ग्यास बोकेका सवारीबाहेक १० चक्केभन्दा ठूला तथा १५ टनभन्दा बढी भार भएका मालवाहक सवारीलाई अर्को व्यवस्था नभएसम्म त्रिभुवन राजपथमा सञ्चालन गर्न रोक लगाएको छ । यात्रुवाहक सवारीमा भने ११ मिटर लम्बाइसम्मका सवारीलाई मात्र सञ्चालन गर्न दिइएको छ ।
कुलेखानी जलाशयको पानीको सतह बढेपछि प्रशासनले आइतबार साँझदेखि देउराली–सिस्नेरी सडकखण्डमा पनि सवारी आवागमन बन्द गरेको छ । हेटौंडा–काठमाडौं जोड्ने छोटो दूरीको यो मार्ग बन्द भएपछि त्रिभुवन राजपथमा सवारीको चाप थप बढेको प्रशासनले जनाएको छ ।
यसअघि पनि काठमाडौं जोड्ने सडक प्रभावित हुँदा त्रिभुवन राजपथ वैकल्पिक मार्गका रूपमा प्रयोग हुँदै आएको थियो । गत भदौ १० गते रसुवाको भोटेकोशीमा आएको बाढीपछि त्रिशूली नदीको कटानका कारण पृथ्वी राजमार्ग प्रभावित हुँदा पनि यही सडक लामो समय वैकल्पिक मार्ग बनेको थियो ।
काठमाडौंलाई तराईसँग जोड्ने पुराना सडक मार्गमध्ये पर्ने त्रिभुवन राजपथ भारतको सहयोगमा सन् १९५० को दशकमा निर्माण गरिएको हो । साँघुरा घुम्ती, पुरानो सडक संरचना र जोखिमयुक्त भूभागका कारण सामान्य अवस्थामा यसको प्रयोग कम हुने गरे पनि मुख्य सडक अवरुद्ध हुँदा यही मार्ग राजधानीको भरपर्दो वैकल्पिक सडक सम्पर्क बन्दै आएको छ ।
प्रजिअ अधिकारीले सडकको अवस्था बुझेर प्रशासनले जारी गरेको समयतालिकाअनुसार मात्र यात्रा गर्न चालक, व्यवसायी र यात्रुलाई आग्रह गरेका छन् । अत्यावश्यक यात्रामा त्रिभुवन राजपथ प्रयोग गर्दा तोकिएको समय र सवारीसम्बन्धी मापदण्ड पालना गर्न प्रशासनले अनुरोध गरेको छ ।
