धरान । नेपालका लागि टीभीएस मोटर कम्पनीको आधिकारिक वितरक जगदम्बा मोटर्स प्रालिले धरानमा नयाँ टीभीएस एनटर्क १५० सार्वजनिक गरेको छ।
चर्चित गायक बिपुल क्षेत्रीको कन्सर्टका बीच सार्वजनिक गरिएको एनटर्क १५० को अनावरण क्षेत्री, पौरख लुइँटेल र जगदम्बा मोटर्सकी वरिष्ठ बजार व्यवस्थापक करुणा पुडासैनीले संयुक्त रूपमा गरेका थिए।
कार्यक्रममा टीभीएसका ग्राहक, सञ्चारकर्मी, सामग्री निर्माता, विक्रेता तथा अन्य अतिथिको सहभागिता रहेको थियो।
टीभीएस एनटर्क १५० मा १४९.७ सीसी क्षमताको हावाबाट चिस्याइने इन्जिन छ। इन्जिनले ७ हजार घुमाइ प्रतिमिनेटमा १३.२ पीएस शक्ति र ५ हजार ५ सय घुमाइ प्रतिमिनेटमा १४.२ एनएम घुमाउरो बल उत्पादन गर्छ।
कम्पनीका अनुसार स्कुटरले शून्यदेखि ६० किलोमिटर प्रतिघण्टाको गति ६.३ सेकेन्डमा हासिल गर्न सक्छ भने यसको अधिकतम गति १०४ किलोमिटर प्रतिघण्टा रहेको छ।
एनटर्क १५० को बनोट लडाकु विमानबाट प्रेरित रहेको कम्पनीले जनाएको छ। यसमा बहुबिन्दु प्रकाश प्रक्षेपक, वायुगतिकीय पखेटा, विमानबाट प्रेरित हावाका छिद्र, रङ्गीन मिश्रधातुका पाङ्ग्रा, मोटरसाइकल शैलीको ह्यान्डलबार र ‘टी’ आकारको पछाडिको बत्ती राखिएको छ।
स्कुटरमा स्मार्ट जडान प्रविधिसहित ५० भन्दा बढी सुविधा उपलब्ध छन्। यसमा मार्गनिर्देशन, पार्क गरिएको स्थान पहिचान, फोन तथा सन्देशको सूचना र विभिन्न सवारी सञ्चालन विधि समावेश छन्।
सुरक्षाका लागि एकल च्यानल एबीएस, चिप्लिनबाट नियन्त्रण गर्ने प्रविधि, आपत्कालीन बत्ती तथा अगाडिको बत्तीमा थप समयसम्म उज्यालो दिने सुविधा राखिएको छ। अगाडि र पछाडि झट्का कम गर्ने संयन्त्र, मिलाउन सकिने ब्रेकको डन्डी, सहज रूपमा उभ्याउन मिल्ने आधार र २२ लिटर क्षमताको सिटमुनिको भण्डारण स्थान पनि रहेको छ।
जगदम्बा मोटर्सकी वरिष्ठ बजार व्यवस्थापक करुणा पुडासैनीले एनटर्कले प्रदर्शन, प्रविधि र बनोटमार्फत युवा राइडरमाझ बलियो सम्बन्ध बनाएको बताइन्। एनटर्क १५० मार्फत यही विरासतलाई थप शक्तिशाली उत्पादनका साथ अगाडि बढाउन खोजिएको उनले बताइन्।
एनटर्क १५० स्टिल्थ सिल्भर, रेसिङ रेड र टर्बो ब्लु गरी तीन रङमा उपलब्ध छ। यसको प्रारम्भिक मूल्य ३ लाख ६९ हजार ९ सय रुपैयाँ तोकिएको छ। स्कुटर नेपालभर रहेका जगदम्बा मोटर्सका बिक्री केन्द्रबाट उपलब्ध हुने कम्पनीले जनाएको छ।
