काठमाडौं । घरायसीदेखि व्यावसायिक आवश्यकतासम्मका विभिन्न सेवा एउटै डिजिटल प्लेटफर्मबाट उपलब्ध गराउने उद्देश्यसहित ‘डेली सेवा’ सञ्चालनमा आएको छ । डेली सेवा प्रालिले दैनिक जीवनमा आवश्यक पर्ने सेवा सहज, छिटो र व्यवस्थित रूपमा उपलब्ध गराउने लक्ष्यसहित स्वचालित डिजिटल सर्भिस मार्केटप्लेस सुरु गरेको हो ।
कम्पनीका अनुसार डेली सेवालाई नेपालको आफ्नै डिजिटल स्मार्ट बजारका रूपमा विकास गरिएको छ । मोबाइल एप तथा वेबसाइटमार्फत सेवाग्राहीले आफूलाई आवश्यक सेवा खोजेर आफ्नो स्थानबाटै सेवा लिन सक्नेछन् । त्यस्तै, व्यक्ति वा कम्पनीले आफूले प्रदान गर्ने सेवा तथा व्यवसायको विवरण राखेर प्लेटफर्ममा सेवाप्रदायकका रूपमा आबद्ध हुन सक्नेछन् ।
डेली सेवा एपमा घर निर्माण तथा मर्मत, विद्युतीय उपकरण मर्मत, सीप तथा तालिम, विशेषज्ञ सेवा, ग्याजेट तथा प्राविधिक सहयोग, अनकल सेवा, लजिस्टिक्स तथा ढुवानी, किचन र क्लिनिङलगायत विभिन्न क्षेत्रका सेवा समेटिएका छन् । कम्पनीले हाल १० विधामा १०० भन्दा बढी सेवा उपलब्ध रहेको जनाएको छ ।
कम्पनीका प्रमुख कार्यकारी अधिकृत प्रकाश न्यौपानेले दैनिक जीवन, घर, व्यवसाय र विशेषज्ञ आवश्यकतासँग सम्बन्धित सेवाहरूलाई एउटै डिजिटल प्लेटफर्ममा जोड्ने उद्देश्यले डेली सेवा विकास गरिएको बताए ।
‘आफूलाई आवश्यक परेको सेवा घरमै बसेर लिन सकिने भएकाले समय र श्रम दुवै बचत हुने अपेक्षा गरेका छौँ,’ न्यौपानेले भने, ‘हाल एपमा १० विधाका १०० भन्दा बढी सेवा उपलब्ध छन् ।’
कम्पनीले दक्ष, अर्धदक्ष तथा अदक्ष जनशक्तिलाई रोजगारी र व्यवसाय विस्तारको अवसर उपलब्ध गराउने लक्ष्यसमेत राखेको छ । सेवाप्रदायकले प्लेटफर्ममार्फत आफ्नो सेवा प्रवर्धन गर्दै थप सेवाग्राहीसम्म पुग्ने अवसर पाउने कम्पनीको भनाइ छ ।
डेली सेवाले सेवाप्रदायकको छनोट तथा व्यवस्थापनमा विश्वास, गुणस्तर र व्यावसायिकतालाई प्राथमिकता दिएको जनाएको छ । सेवाग्राहीले सेवा लिएपछि त्यसको मूल्यांकन गर्न सक्ने व्यवस्था पनि प्लेटफर्ममा राखिएको छ ।
नेपालमा डिजिटल अर्थतन्त्र विस्तार हुँदै जाँदा विभिन्न सेवा अनलाइनबाट खोज्ने र लिने प्रवृत्ति बढिरहेको छ । यही परिवर्तनलाई लक्षित गर्दै नेपाली प्रविधि र जनशक्तिमा आधारित सेवा बजार निर्माण गर्ने अवधारणासहित डेली सेवा अघि बढेको कम्पनीले जनाएको छ ।
हाल काठमाडौं उपत्यकाबाट सेवा सुरु गरेको डेली सेवाले आगामी दिनमा देशभर विस्तार गर्ने लक्ष्य लिएको छ । कम्पनीले घरायसी आवश्यकता, व्यवसाय सञ्चालन र विशेषज्ञ सेवासम्मका आवश्यकतालाई एउटै डिजिटल बजारमार्फत जोड्ने योजना अघि सारेको छ ।
