एजेन्सी । हुन्डाई मोटरले सन् २०२६ को पेरिस मोटर शोमा नयाँ बायोङ कम्प्याक्ट एसयूभी सार्वजनिक गरेको छ । पेट्रोल इन्जिनमा उपलब्ध हुने यो एसयूभीको हाइब्रिड संस्करण सन् २०२७ मा बजारमा आउने कम्पनीले जनाएको छ ।
नयाँ बायोङमा ठूलो रियर लेगरुम, ४४० लिटरको बुट क्षमता, पानोरामिक सनरुफ र आधुनिक प्रविधि समावेश छन् । हुन्डाईले यसलाई दैनिक यात्रा, पारिवारिक प्रयोग र लामो दूरीको यात्रालाई ध्यानमा राखेर विकास गरेको जनाएको छ ।
नयाँ बायोङको लम्बाइ ४ हजार २४५ मिलिमिटर, चौडाइ १ हजार ८१० मिलिमिटर र उचाइ १ हजार ५६५ मिलिमिटर छ । यसको ह्विलबेस २ हजार ६०० मिलिमिटर रहेको छ । अघिल्लो संस्करणको तुलनामा यसको लम्बाइ ६५ मिलिमिटर र ह्विलबेस २० मिलिमिटर बढाइएको छ ।
हुन्डाईका अनुसार, नयाँ बायोङमा आफ्नो श्रेणीअनुसार पछाडिका यात्रुका लागि पर्याप्त लेगरुम तथा अगाडि र पछाडि दुवैतर्फ राम्रो हेडरुम र सोल्डर रुम उपलब्ध छन् । पछाडिका सिटमा रिक्लाइनिङ सुविधा, सेन्टर आर्मरेस्ट, हिटरयुक्त सिट र छुट्टै भेन्टिलेसनको व्यवस्था छ । अगाडिका सिटमा पनि हिटिङ र भेन्टिलेसन सुविधा उपलब्ध छन् ।
यसको ४४० लिटरको बुटमा भुइँमुनि थप सामान राख्ने ठाउँसमेत छ । बुट क्षमताका आधारमा यो हुन्डाई क्रेटाभन्दा सात लिटर ठूलो रहेको छ ।
नयाँ बायोङमा १.० टी–जीडीआई टर्बो पेट्रोल इन्जिनका दुई विकल्प उपलब्ध हुनेछन् । ९० पीएस र ११५ पीएस क्षमताका इन्जिनमा ६ स्पिड म्यानुअल वा ७ स्पिड डुअल क्लच गियरबक्सको विकल्प दिइएको छ । यसको अधिकतम गति प्रतिघण्टा १६७ देखि १८० किलोमिटरसम्म रहने कम्पनीको प्राविधिक विवरणमा उल्लेख छ ।
सन् २०२७ मा सार्वजनिक हुने १.६ एचईभी हाइब्रिड संस्करणले १३८ पीएस पावर उत्पादन गर्ने अपेक्षा गरिएको छ । यसमा ६ स्पिड डुअल क्लच गियरबक्स र एडाप्टिभ रिजेनेरेटिभ ब्रेकिङ प्रणाली रहनेछ । उक्त प्रणालीले चालकलाई विद्युतीय सवारीसाधनमा जस्तै ड्राइभिङ अनुभव प्रदान गर्ने कम्पनीको दाबी छ ।
प्रविधितर्फ नयाँ बायोङमा १२.३ इन्चका दुईवटा कर्भ्ड डिस्प्ले, वायरलेस एप्पल कारप्ले, एन्ड्रोइड अटो र वायरलेस चार्जिङ सुविधा छन् । हुन्डाई डिजिटल की २ मार्फत मिल्दो स्मार्टफोन वा स्मार्टवाचबाट गाडी अनलक गर्न र स्टार्ट गर्न सकिनेछ ।
सुरक्षाका लागि हुन्डाईको स्मार्टसेन्स प्याकेजअन्तर्गत हाइवे ड्राइभिङ असिस्ट २, सराउन्ड भ्यु मनिटर, ब्लाइन्ड स्पट भ्यु मनिटर, स्मार्ट क्रुज कन्ट्रोल र लेन फलोइङ असिस्टजस्ता सुविधा उपलब्ध हुनेछन् । पार्किङ तथा सम्भावित ठक्करबाट जोगिन सहयोग गर्ने विभिन्न प्रणाली पनि समावेश गरिएका छन् ।
कम्पनीले नयाँ बायोङको स्पोर्टी एन लाइन संस्करणसमेत सार्वजनिक गरेको छ । यसमा १८ इन्चका विशेष पांग्रा, हाई ग्लोस ब्ल्याक क्ल्याडिङ, इन्टिग्रेटेड ट्विन निकास र विशेष डिजाइनका सिट राखिएका छन् ।
हुन्डाईले नयाँ बायोङको मूल्य भने सार्वजनिक गरेको छैन । केही सञ्चारमाध्यमका रिपोर्टअनुसार यसको अनुमानित मूल्य भेरियन्टअनुसार ९ लाखदेखि १७ लाख ५० हजार भारतीय रुपैयाँसम्म हुन सक्नेछ ।
