काठमाडौं । थाई दूतावासको भिसा प्रक्रियाप्रति आउटबाउन्ड टुर्स एसोसिएसन अफ नेपाल (ओटान) ले कडा आपत्ति जनाएको छ । भिसा आवेदनमा नयाँ नियम लागू हुनुअघि दर्ता भएका निवेदनमा समेत नयाँ मापदण्ड लागू गरिएको भन्दै ओटानले भूतप्रभावी नियम नलगाउन आग्रह गरेको छ ।
ओटानले प्रेस विज्ञप्ति जारी गर्दै अपारदर्शी र अव्यावहारिक भिसा प्रक्रियाका कारण नेपाली यात्रु तथा ट्राभल एजेन्सीहरूले आर्थिक क्षति र मानसिक तनाव भोग्नुपरेको जनाएको छ । दूतावासले माग गरेका कागजात पूरा गरेर आवेदन दिँदासमेत भिसा अस्वीकृत गर्ने र सामान्य त्रुटि सच्याउने अवसरसमेत नदिने गरेको व्यवसायीहरूको गुनासो छ ।
विज्ञप्तिअनुसार १५ देखि २० दिनअघि दर्ता भएका आवेदनमा दुई दिनअघि लागू गरिएको नयाँ नियमका आधारमा भिसा अस्वीकृत गरिनु प्रशासनिक न्यायको सिद्धान्तविपरीत हो । ओटानले पुराना आवेदनलाई पहिलेकै मापदण्डअनुसार पुनर्विचार गर्न माग गरेको छ ।
व्यवसायीहरूका अनुसार भिसा स्वीकृत हुने सुनिश्चितता नहुँदासमेत दूतावासले कन्फर्म हवाई टिकट र होटलको मूल बुकिङ माग्ने गरेको छ । यसका लागि यात्रुले लाखौँ रुपैयाँ अग्रिम खर्च गर्नुपर्ने र भिसा नआएमा वा निर्णय ढिलो हुँदा फिर्ता नहुने टिकट तथा होटल बुकिङको रकम गुम्ने जोखिम रहेको ओटानले जनाएको छ ।
बुकिङ डटकम र अगोडाजस्ता अन्तर्राष्ट्रिय प्रणालीबाट गरिएका होटल बुकिङलाई मान्यता नदिई होटलबाट छुट्टै पत्र माग्दा प्रक्रिया थप झन्झटिलो र खर्चिलो बनेको व्यवसायीहरूको भनाइ छ । दशैंतिहारको बिदामा परिवारसहित थाइल्याण्ड घुम्न जाने यात्रु बढी प्रभावित भएको र एउटै परिवारका केही सदस्यको भिसा स्वीकृत तथा केहीको अस्वीकृत हुँदा यात्रा नै प्रभावित भएको विज्ञप्तिमा उल्लेख छ ।
ओटानले भिसा अस्वीकृति र निर्णयमा हुने ढिलाइका कारण यात्रुले ठूलो रकम गुमाउनुपरेको भन्दै प्रक्रियामा कुनै अनुचित मिलेमतो छ कि छैन भन्ने विषयमा स्वतन्त्र र निष्पक्ष छानबिन गर्नसमेत माग गरेको छ । भिसासम्बन्धी जानकारी लिन खोज्दा दूतावासले फोन नउठाउने र जवाफ दिन पन्छिने गरेको गुनासो पनि व्यवसायीहरूले गरेका छन् ।
ओटानले भिसाका मापदण्ड स्पष्ट र लिखित रूपमा सार्वजनिक गर्न, नयाँ नियम लागू गर्नुभन्दा कम्तीमा ३० दिनअघि सूचना दिन, भिसा अस्वीकृत गर्दा स्पष्ट लिखित कारण खुलाउन र सामान्य त्रुटि सच्याउने अवसर दिन माग गरेको छ । त्यस्तै, भिसा निर्णय नभएसम्म अस्थायी हवाई टिकट तथा होटल बुकिङ स्वीकार गर्न र निर्णयका लागि निश्चित समयसीमा तोक्न आग्रह गरेको छ ।
नेपाल सरकार, परराष्ट्र मन्त्रालय र पर्यटन मन्त्रालयले थाई सरकारसँग उच्चस्तरीय कूटनीतिक पहल गरी नेपाली यात्रुको आर्थिक सुरक्षा सुनिश्चित गर्न पनि ओटानले माग गरेको छ ।
ओटानका अध्यक्ष माधव कँडेलले यात्रुलाई भिसा आवेदनमा सावधानी अपनाउन आग्रह गरेका छन् । उनले भिसा नआउँदासम्म फिर्ता नहुने टिकट तथा होटलमा अग्रिम भुक्तानी नगर्न, फिर्ता गर्न मिल्ने बुकिङ रोज्न र आधिकारिक ट्राभल एजेन्सीको परामर्श लिएर मात्र यात्राको तयारी गर्न सुझाव दिएका छन् ।
नेपाली ट्राभल एजेन्सीहरूले लामो समयदेखि थाइल्याण्डको पर्यटन तथा अर्थतन्त्रमा योगदान पुर्याउँदै आएको उल्लेख गर्दै ओटानले नेपाली यात्रुले पारदर्शी, सम्मानजनक र न्यायोचित व्यवहार पाउनुपर्ने जनाएको छ ।
