काठमाडौं । विद्युतीय दुईपांग्रे सवारीसाधन ब्रान्ड याडियाका तीन नयाँ इलेक्ट्रिक स्कुटर नेपाली बजारमा सार्वजनिक हुने भएका छन्। नेपालका लागि आधिकारिक वितरक कुजु नेपाल प्रालिले नयाँ स्कुटर सिरिज ल्याउने घोषणा गरेको हो।
कम्पनीले जीएस७०, जीटी७० र जीटी८० मोडलका स्कुटर सार्वजनिक गर्न लागेको जनाएको छ। आधुनिक प्रयोगकर्ताको आवश्यकता लक्षित यी स्कुटरमा अत्याधुनिक प्रविधि, उन्नत सुरक्षा प्रणाली, स्मार्ट कनेक्टिभिटी र लामो रेन्ज उपलब्ध हुने कम्पनीको दाबी छ।
कुजु नेपालका अनुसार नयाँ सिरिजले नेपालमा स्मार्ट, दिगो र भरपर्दो विद्युतीय यातायातलाई प्रवर्द्धन गर्ने लक्ष्य राखेको छ। दैनिक सहरी आवागमनदेखि लामो दूरीको यात्रासम्मका लागि यी स्कुटर उपयुक्त हुने कम्पनीको भनाइ छ।
तीनै मोडलको प्राविधिक विशेषता, मूल्य, उपलब्धता तथा विशेष लन्च अफर औपचारिक सार्वजनिक कार्यक्रममार्फत घोषणा गरिने कम्पनीले जनाएको छ।
कम्पनीका अनुसार वातावरणमैत्री, किफायती र आधुनिक विद्युतीय सवारी खोजिरहेका नेपाली उपभोक्ताका लागि याडियाको नयाँ स्कुटर सिरिज आकर्षक विकल्प बन्ने अपेक्षा गरिएको छ।
