काठमाडौं । अर्थ मन्त्रालयले नागरिक लगानी कोषको रिक्त कार्यकारी निर्देशक पदका लागि पाँच जना उम्मेदवारको संक्षिप्त सूची (सर्टलिस्ट) सार्वजनिक गरेको छ।
खुला प्रतिस्पर्धाबाट पदपूर्तिका लागि परेका आवेदनमध्ये उम्मेदवारको शैक्षिक योग्यता, कार्यअनुभव तथा व्यावसायिक र वित्तीय कार्ययोजनाको मूल्यांकनका आधारमा पाँच जनालाई अन्तिम छनोटका लागि सर्टलिस्ट गरिएको मन्त्रालयले जनाएको छ।
सर्टलिस्टमा अर्जुनकुमार गौतम (मध्यपुर ठिमी–१, भक्तपुर), गोपाल घिमिरे (काठमाडौं महानगरपालिका–३२, काठमाडौं), पर्वतकुमार काकी (लिम्चुङबुङ–२, उदयपुर), यज्ञप्रकाश न्यौपाने (टोखा–६, काठमाडौं) र समता पन्त (भट्ट) (काठमाडौं महानगरपालिका–२८, काठमाडौं) परेका छन्।
नागरिक लगानी कोषको कार्यकारी निर्देशक छनोट तथा सिफारिस समितिको साउन २१ गते बसेको बैठकको निर्णयअनुसार नामावली र कार्यतालिका सार्वजनिक गरिएको हो।
समितिले सर्टलिस्टमा परेका उम्मेदवारहरूको व्यावसायिक कार्ययोजना प्रस्तुतीकरण र अन्तर्वार्ता साउन २५ र २६ गते सञ्चालन गर्ने जनाएको छ। प्रस्तुतीकरण तथा अन्तर्वार्ता अर्थ मन्त्रालय, सिंहदरबार मा हुनेछ।
