काठमाडौं । काठमाडौंबाट नेपालगञ्जका लागि उडेको श्री एयरलाइन्सको विमान अवतरणको तयारीका क्रममा प्राविधिक समस्या देखिएपछि पुनः काठमाडौं फर्किएको छ।
बिहीबार साँझ नेपालगञ्ज अवतरण गर्न लाग्दा विमानको पखेटामा प्रयोग हुने ‘फ्ल्याप’को सन्तुलन नमिलेको संकेत देखिएपछि पाइलटले सुरक्षालाई प्राथमिकतामा राख्दै जहाज काठमाडौं फर्काउने निर्णय गरेका हुन्।
साँझ करिब ६ः३० बजे नेपालगञ्जको आकाशमा पुगेको विमानमा अवतरण जोखिमपूर्ण हुन सक्ने अवस्था देखिएपछि काठमाडौं फर्काइएको नेपालगञ्ज विमानस्थलले जनाएको छ।
विमान सुरक्षित रूपमा काठमाडौं अवतरण गरेको छ। घटनामा यात्रु तथा चालक दलका सबै सदस्य सुरक्षित रहेका छन्। एयरलाइन्सले प्राविधिक परीक्षणपछि मात्रै विमान पुनः सञ्चालनमा ल्याइने जनाएको छ।
