काठमाडौं । दुबईका चर्चित कन्टेन्ट क्रियटर जमजम दाजुभाइ नेपाल आइपुगेका छन् । उनीहरू शुक्रबार बिहान काठमाडौं आर्लिएका हुन् ।
उनीहरू शनिबार सिभिल मलमा जमजम पर्फ्युमको औपचारिक लन्च गर्दैछन् । मलको पहिलो तल्लामा रहेको स्टोरमा लन्च कार्यक्रम १ बजेका लागि तय गरिएको हो । उनीहरू शनिबारै दुबई फर्कँदैछन् ।
जमजम दाजुभाइको वास्तविक नाम अब्दुल गफुर र मोहम्मद शकुर हो । अब्दुल गफुरलाई ‘बडे भाइ’ (ठूल्दाइ) र मोहम्मद शकुरलाई ‘छोटे भाइ’ (सानोभाइ) भनेर चिनिन्छ । उनीहरू मूलतः पाकिस्तानको गुजरात सहरका हुन्, तर हाल उनीहरू संयुक्त अरब इमिरेट्सको दुबईमा बस्छन् । उनीहरूले अत्यन्तै सामान्य अवस्थाबाट आफ्नो व्यवसाय सुरु गरेका थिए र अहिले दुबईका सफल व्यवसायीहरूमध्ये पर्छन् ।
जमजम दाजुभाइ जमजम इलेक्ट्रोनिक्सका सञ्चालक हुन् । यो दुबईमा मोबाइल फोन, ल्यापटप र अन्य विद्युतीय सामग्रीहरूका लागि निकै प्रसिद्ध पसल हो । उनीहरूले आफ्ना उत्पादनहरू बेच्नका लागि प्रयोग गर्ने शैली निकै फरक र रमाइलो छ, जसले गर्दा उनीहरू विश्वभर चर्चित भए ।
उनीहरूको युट्युब च्यानलमा करोडौं सब्सक्राइबरहरू छन् । टिकटक र इन्स्टाग्राममा पनि उनीहरूको ठूलो फ्यान फलोइङ छ ।
उनीहरूले आफ्ना भिडियोहरूमा धेरैजसो उपहारको कुरा गर्छन् । उनीहरूको बोल्ने शैली, ऊर्जा र सामान किन्ने ग्राहकहरूलाई दिने सरप्राइजहरूका कारण मानिसहरू उनीहरूलाई निकै मन पराउँछन् ।
इलेक्ट्रोनिक्स बाहेक उनीहरूले अहिले आफ्नो व्यवसाय सुगन्धित अत्तर (पर्फ्युम) र घरजग्गामा पनि विस्तार गरेका छन् ।
जमजम दाजुभाइ नेपालीहरूमाझ पनि निकै लोकप्रिय छन् । उनीहरूले प्रशंसकहरूसँग भेटघाट गर्ने कार्यक्रमहरू पनि तय गरिएको छ ।
