काठमाडौं । अल्ट्राभायोलेटको नयाँ इलेक्ट्रिक क्रसओभर मोटरसाइकल एक्स४७ नेपालमा सार्वजनिक भएको छ । नेपालका लागि आधिकारिक वितरक वैद्य अर्गनाइजेसनले नाइमा नेपाल मोबिलिटी एक्स्पोमार्फत एक्स४७ सार्वजनिक गरेको हो ।
दैनिक आवागमनसँगै लामो दूरीको यात्रा र साहसिक राइडलाई लक्षित गरेर डिजाइन गरिएको एक्स४७ मा उच्च प्रदर्शन र आधुनिक प्रविधि समेटिएको कम्पनीले जनाएको छ ।
नेपालमा अल्ट्राभायोलेटले यसअघि नै एफ७७ ओरिजिनल र एफ७७ रिकनको बुकिङ खुला गरिसकेको छ । एफ७७ ओरिजिनलको सुरुआती मूल्य ८ लाख ११ हजार रुपैयाँ र एफ७७ रिकनको मूल्य ९ लाख ६९ हजार रुपैयाँ तोकिएको छ ।
एक्स४७ मा १०.३ किलोवाट आवरको ब्याट्री प्याक जडान गरिएको छ । यसले एकपटकको फुल चार्जमा आईडीसी मापदण्डअनुसार ३२३ किलोमिटरसम्मको रेन्ज दिने कम्पनीको दाबी छ ।
मोटरसाइकलमा ३० किलोवाट क्षमताको इलेक्ट्रिक मोटर दिइएको छ । यसले १०० न्युटन मिटर टर्क उत्पादन गर्छ । एक्स४७ ले ० देखि ६० किलोमिटर प्रतिघण्टाको गति २.८ सेकेन्डमै हासिल गर्ने र यसको अधिकतम गति १५५ किलोमिटर प्रतिघण्टा रहेको कम्पनीले जनाएको छ ।
सुरक्षाका लागि मोटरसाइकलमा ३९ लेभलको ट्र्याक्सन कन्ट्रोल सिस्टम उपलब्ध छ । यसले फरक सडक तथा राइडिङ अवस्थामामा मोटरसाइकलको पकड र स्थिरता कायम राख्न सहयोग गर्ने कम्पनीको दाबी छ ।
एक्स४७ को मूल्य १० लाख ५० हजार रुपैयाँ तोकिएको छ । कम्पनीका अनुसार नाइमा नेपाल मोबिलिटी एक्स्पोपछि यसको मूल्य बढाइनेछ ।
