काठमाडौं । सहकारीमा अड्किएको बचत फिर्ता हुने क्रम अघि बढेको छ। राष्ट्रिय सहकारी नियमन प्राधिकरणका अनुसार विभिन्न १० सहकारी संस्थाका १९७ जना बचतकर्ताले आफ्नो रोकिएको रकम फिर्ता पाएका छन्। सम्बन्धित सहकारीका बचतकर्ताले आवश्यक प्रक्रिया पूरा गरेपछि रकम फिर्ता गरिएको प्राधिकरणले जनाएको छ।
रकम फिर्ता पाउनेमध्ये ठूलो हिस्सा ब्रिटिस गोर्खा बचत तथा ऋण सहकारी संस्थाका बचतकर्ता छन्। उक्त सहकारीका मात्रै १७४ जना बचतकर्ताले बचत रकम फिर्ता पाएका छन्। बाँकी नौ सहकारीका २३ जना बचतकर्तालाई विभिन्न परिमाणमा रकम फिर्ता गरिएको प्राधिकरणले जनाएको छ।
प्राधिकरणका अनुसार रकम फिर्ता गरिएका सहकारीमा सङ्कल्प बचत तथा ऋण, वीर विनायक बचत तथा ऋण, समदर्शी उपभोक्ता, पूर्वोदय बचत तथा ऋण, अर्थ बहुउद्देश्यीय, श्वेत भैरव बचत तथा ऋण, सिर्जनशील बचत तथा ऋण, ब्रिटिस गोर्खा बचत तथा ऋण, गेनबेल बचत तथा ऋण र शोभा भगवती बहुउद्देश्यीय सहकारी संस्था रहेका छन्।
सहकारी संस्थामा समस्या देखिएपछि लामो समयदेखि बचत फिर्ताको पर्खाइमा रहेका बचतकर्ताका लागि रकम फिर्ता हुन थालेको यो पछिल्लो प्रगति हो। प्राधिकरणले सम्बन्धित सहकारीका बचतकर्ताले पूरा गर्नुपर्ने प्रक्रिया पूरा गरेपछि रोकिएको रकम फिर्ता गराउँदै आएको जनाएको छ।
सहकारी क्षेत्रमा देखिएका समस्या समाधान गर्दै बचतकर्ताको रकम फिर्ता गराउने कामलाई प्राथमिकतामा राखिएको प्राधिकरणको भनाइ छ। समस्या परेका सहकारीको नियमन, व्यवस्थापन तथा बचत फिर्ताको प्रक्रियालाई थप प्रभावकारी बनाउँदै लैजाने प्राधिकरणले जनाएको छ।
पछिल्लो चरणमा १० सहकारीका १९७ बचतकर्ताले रकम पाए पनि सहकारी क्षेत्रमा अझै ठूलो संख्यामा बचतकर्ताको रकम रोकिएको छ। त्यसैले पछिल्लो फिर्तीले राहत दिए पनि सबै बचतकर्ताको पैसा फिर्ता गर्ने प्रक्रिया अझै लामो रहेको देखिन्छ।
