काठमाडौं । आन्तरिक राजस्व विभागले करदाता प्रोत्साहन पुरस्कारअन्तर्गत साउन महिनाको दोस्रो पाक्षिक पुरस्कार घोषणा गरेको छ । अर्थ मन्त्रालयमा आयोजित कार्यक्रममा अर्थमन्त्री डा. स्वर्णिम वाग्ले र अर्थसचिव डा. घनश्याम उपाध्यायले पुरस्कार घोषणा गरेका हुन् ।
साउन १६ देखि ३१ गतेसम्म नियमसम्मत कारोबार गर्ने उपभोक्ता पुरस्कार योजनामा सहभागी भएका थिए । विभागका अनुसार पहिलो महिनामै पुरस्कारमा सहभागी हुने उपभोक्ताको सङ्ख्या उल्लेख्य रूपमा बढेको छ ।
यसपटक गणेश इलेक्ट्रोनिक्स एण्ड मोबाइल सेन्टरबाट ३५० रुपैयाँको सामान खरिद गर्ने एक उपभोक्ताले बम्पर उपहारस्वरूप १० लाख रुपैयाँ जितेका छन् । उक्त पुरस्कारमा २५ प्रतिशत कर लाग्नेछ ।
साउन १६ देखि ३१ गतेसम्म ३ लाख ५७ हजार १४९ वटा नगद कारोबारका बिल पुरस्कारका लागि दर्ता भएका थिए । साउनको पहिलो १५ दिनमा यस्तो बिल अपलोड गर्नेको सङ्ख्या ७ हजार ७७ मात्रै थियो ।
यस्तै, क्यूआर कारोबारमार्फत स्वतः पुरस्कार योजनामा सहभागी हुने कारोबार सङ्ख्या २ करोड ५६ लाख ८ हजार ९४ बाट बढेर ३ करोड २० लाख ८६ हजार ३८० पुगेको विभागले जनाएको छ ।
पछिल्लो १७ दिनमा पुरस्कार योजनामा सहभागी कुल कारोबार सङ्ख्या ३ करोड २४ लाख ४३ हजार २२९ पुगेको छ । यही कारोबारमध्येबाट १७ जना विजेता छनोट गरिएको हो ।
साउन १६ देखि ३१ गतेसम्मका १७ दिनका लागि दैनिक एक जनाका दरले १७ जना विजेताले प्रतिव्यक्ति १ लाख ३३ हजार ३३४ रुपैयाँ पुरस्कार पाएका छन् । कर कटाएपछि उनीहरूले खुद १ लाख रुपैयाँ प्राप्त गर्नेछन् ।
यिनै विजेतामध्येबाट एक जनालाई बम्पर उपहारस्वरूप १० लाख रुपैयाँ प्रदान गरिएको हो ।
