महोत्तरी। वनक्षेत्र फँडानी गरी अतिक्रमण गर्नेविरुद्ध कडा कारबाहीको तयारी गरिएको छ । डिभिजन वन कार्यालय महोत्तरीले सागरनाथ वन विकास परियोजनाको दुई नम्बर प्लटमा रुख काट्ने तथा रुखको फेदमा विषादी प्रयोग गरी सुकाउने कार्यमा संलग्नको पहिचान गरी कारबाही प्रक्रिया अघि बढाएको हो ।
डिभिजन वन कार्यालयका वरिष्ठ वन अधिकृत अजय मिश्रका अनुसार उक्त क्षेत्रमा १९५ वटा टिक जातका रुख काटिएको तथा केही रुखको जरामा विषादी प्रयोग गरिएको अनुसन्धानबाट खुलेको छ । घटनामा संलग्न वन माफियाको खोजी भइरहेको उनले बताए ।
बर्दिवास रेञ्जपोस्टका प्रमुख प्रेम उपाध्यायले घटनाको सूक्ष्म अनुसन्धान भइरहेको र वन फँडानीमा संलग्न व्यक्तिको पहिचान नजिक पुगेको जानकारी दिए ।
‘हामीले घटनाको सूक्ष्म अनुसन्धान गरेका छौँ । रुख काट्ने तथा फेदमा विषादी हालेर जरासमेत नष्ट गर्नेबारे जानकारी प्राप्त भएको छ,’ उपाध्यायले भने, ‘प्रतिवेदन लेखन अन्तिम चरणमा छ । प्रतिवेदन डिभिजन वन कार्यालयमा बुझाएपछि कानुनी कारबाही अघि बढ्छ ।’
उनका अनुसार बर्दिवास रेञ्जपोस्टको प्रतिवेदनका आधारमा डिभिजन वन कार्यालयले मुद्दा अघि बढाउनेछ ।
बर्दिवास नगरपालिकाले सार्वजनिक तथा पर्ति जग्गा लामो समयदेखि भोगचलन गर्दै आएकालाई ‘सेतो निस्सा’ दिने घोषणा गरेपछि आफ्नो भोग कायम रहेको देखाउन वनक्षेत्रसमेत उजाडिएको हुन सक्ने स्थानीयको आशंका छ ।
बर्दिवास–२ का वडाध्यक्ष श्यामराजा सिंहले वनक्षेत्र विनाशमा संलग्नको अनुसन्धान गरी दोषी पाइए कडा कारबाही हुनुपर्ने बताए ।
