बागलुङ । किसानका लागि अनुदानमा उपलब्ध गराइएको युरिया मल बागलुङबाट वीरगञ्ज पठाएर कालोबजारी गरेको आरोपमा प्रहरीले तीन जनालाई पक्राउ गरेको छ।
जिल्ला प्रहरी कार्यालय बागलुङका अनुसार बागलुङ बजारका दुई कृषि सामग्री पसलबाट खरिद गरिएको युरिया मल रात्रिबसमार्फत वीरगञ्ज पठाइएको पुष्टि भएपछि उनीहरूलाई नियन्त्रणमा लिइएको हो।
पक्राउ पर्नेमा पर्साको छिपहरमाई गाउँपालिका–६ का दिनेश पण्डितकुमार तथा बागलुङ नगरपालिका–२ का कुलबहादुर रानामगर र विनय शाक्य रहेका छन्।
किसानका लागि जिल्लामै बिक्री गर्नुपर्ने कोटाको मल अन्यत्र पठाएर कालोबजारी गरेको आरोपमा उनीहरूमाथि अनुसन्धान भइरहेको प्रहरीले जनाएको छ।
प्रहरीका अनुसार पक्राउ परेका तीनै जनाविरुद्ध कालोबजारी तथा केही अन्य सामाजिक अपराध तथा सजाय ऐन अन्तर्गत अनुसन्धान अघि बढाइएको छ। अनुदानको मल किसानका लागि तोकिएको प्रणाली र कोटाअनुसार वितरण गर्नुपर्ने भए पनि अन्यत्र पठाइएको पाइएपछि प्रहरीले घटनालाई गम्भीर रूपमा लिएको जनाएको छ।
