काठमाडौं। नेपाल र भारतले आर्थिक साझेदारी विस्तार गर्ने विषयमा सहमति जनाएका छन्। भारत भ्रमणमा रहेका अर्थमन्त्री डा. स्वर्णिम वाग्लेले नयाँ दिल्लीमा भारतीय अर्थ तथा कर्पोरेट मामिला मन्त्री निर्मला सीतारमणसँग बिहीबार द्विपक्षीय भेटवार्ता गरेका छन्।
भेटका क्रममा दुई देशबिचको दीर्घकालीन आर्थिक साझेदारीलाई थप मजबुत र फराकिलो बनाउने विषयमा गहन छलफल भएको छ। दुवै पक्षले विकास सहकार्यका विविध आयामहरूमा जोड दिएका छन्।
छलफलका क्रममा बाढीपछिको पुनर्निर्माण, व्यापार, लगानी, ऊर्जा र कनेक्टिभिटीका साथै द्विपक्षीय हितका अन्य प्रमुख क्षेत्रहरूमा केन्द्रित भई कुराकानी भएको छ। दिल्लीस्थित नेपाली दूतावासका अनुसार दुवै देशबिच भइरहेका आर्थिक तथा विकास प्रयासहरूलाई थप गति दिन र पारस्परिक सहयोग अभिवृद्धि गर्न यो वार्ता महत्त्वपूर्ण रहेको छ।
