काठमाडौं । नाइमा मोबिलिटी एक्स्पो २०२६ को पाँचौँ दिन बहुप्रतीक्षित विद्युतीय कार एआरसीफक्स टी–१ नेपाली बजारमा सार्वजनिक भएको छ। प्रिमियम पारिवारिक क्रसओभर विद्युतीय कारका रूपमा ल्याइएको टी–१ मा सहरी सडक र विविध अवस्थालाई सुहाउने प्रविधि, आरामदायी भित्री भाग र दैनिक प्रयोगका सुविधालाई प्राथमिकता दिइएको छ।
टी–१ को प्रमुख विशेषतामध्ये स्वचालित पार्किङ सहायता प्रणाली रहेको छ। यसले समानान्तर तथा ठाडो रूपमा पार्किङ गर्न र पार्किङ क्षेत्रबाट सुरक्षित रूपमा बाहिर निकाल्न सहयोग गर्छ। काठमाडौंजस्ता व्यस्त सहरका साँघुरा सडक तथा सीमित पार्किङ क्षेत्रमा यो सुविधा उपयोगी हुने देखिन्छ।
गाडीमा ३६० डिग्री वरिपरि दृश्य देखाउने क्यामेरा, साँघुरो सडक सहायता प्रणाली, पछाडि गाडी चलाउँदा अघिल्लो बाटो पहिचान गर्ने प्रणाली तथा अगाडि र पछाडिका पार्किङ सेन्सर छन्। यी सुविधाले भीडभाड तथा साँघुरा स्थानमा गाडी चलाउँदा चालकलाई वरपरको अवस्था बुझ्न सहज बनाउँछन्।
एआरसीफक्स टी–१ मा ७० किलोवाटको विद्युतीय मोटर जडान गरिएको छ, जसले १७० एनएम टर्क उत्पादन गर्छ। ४२.३ किलोवाट आवर क्षमताको लिथियम आइरन फस्फेट ब्याट्रीले एकपटक पूर्ण चार्जमा ३१० किलोमिटरसम्मको डब्लूएलटीपी रेन्ज दिने कम्पनीले जनाएको छ। डीसी द्रुत चार्जरबाट ब्याट्री ३० देखि ८० प्रतिशतसम्म करिब २५ मिनेटमा चार्ज गर्न सकिन्छ।
१८१ मिलिमिटरको ग्राउन्ड क्लियरेन्स रहेको टी–१ नेपालका असमान सडक तथा स्पिड ब्रेकरका लागि पनि उपयुक्त हुने देखिन्छ। यसमा इको, स्पोर्ट, कम्फर्ट र व्यक्तिगत गरी चारवटा ड्राइभिङ मोड उपलब्ध छन्।
सुरक्षाका लागि गाडीमा दोस्रो तहको उन्नत चालक सहायता प्रणाली उपलब्ध छ। यसअन्तर्गत अनुकूलित क्रुज नियन्त्रण, ट्राफिक जाम सहायता, लेनबाट बाहिरिन लागेको चेतावनी, अगाडिको ठक्करको चेतावनी र स्वचालित आपत्कालीन ब्रेकिङजस्ता सुविधा छन्। गाडीका महत्वपूर्ण संरचनात्मक भागमा १ हजार ५०० मेगापास्कलसम्मको उच्च क्षमतायुक्त स्टिल प्रयोग गरिएको छ।
टी–१ मा २ हजार ७५० मिलिमिटरको ह्विलबेस र १५.६ इन्चको सूचना तथा मनोरञ्जन प्रणालीको स्क्रिन छ। दुई क्षेत्रमा छुट्टाछुट्टै तापक्रम नियन्त्रण, आवाज पहिचान प्रणाली तथा अगाडिका सिटमा तातो र चिसो बनाउन मिल्ने सुविधा छ। पछाडिका सिटलाई २८ डिग्रीसम्म ढल्काउन सकिन्छ।
गाडीमा ३२ वटा सामान राख्ने स्थान र सातवटा मोबाइल होल्डर छन्। पछाडिका सिट फोल्ड गर्दा १ हजार ३५२ लिटरसम्म सामान राख्न सकिने कम्पनीले जनाएको छ।
आराम, सुरक्षा, पार्किङ सहायता र दैनिक प्रयोगका सुविधाको संयोजनसहित एआरसीफक्स टी–१ लाई नेपाली बजारमा सहरी परिवार तथा पेशाकर्मी लक्षित विद्युतीय कारका रूपमा प्रस्तुत गरिएको छ। गाडी हाल नाइमा मोबिलिटी एक्स्पो २०२६ मा प्रदर्शनमा राखिएको छ।
