झापा । बैंकिङ कसुर मुद्दामा १७ लाख ३९ हजार ५०० रुपैयाँ जरिवाना ठहर भई फरार रहेका झापाका ५६ वर्षीय हर्कधन सेवा पक्राउ परेका छन्।
शिवसताक्षी नगरपालिका–११ दुधे निवासी सेवालाई उच्च अदालत विराटनगरको इलाम इजलासले चार वर्षअघि बैंकिङ कसुर मुद्दामा उक्त जरिवाना सुनाएको थियो। फैसला कार्यान्वयन नभएपछि उनी फरार रहेका थिए।
जिल्ला प्रहरी कार्यालय झापा र इलाका प्रहरी कार्यालय झिलझिलेबाट खटिएको संयुक्त टोलीले शुक्रबार उनलाई घरनजिकैबाट पक्राउ गरेको हो।
झापा प्रहरीका सूचना अधिकारी प्रहरी नायब उपरीक्षक रञ्जन अवालेका अनुसार पक्राउ परेका सेवालाई फैसला कार्यान्वयनका लागि जिल्ला प्रहरी कार्यालय इलामसँग समन्वय गरी बुझाउने प्रक्रिया अघि बढाइएको छ।
