काठमाडौँ। विपद् व्यवस्थापनमा खटिने सुरक्षाकर्मीले दैनिक खाजा खर्च र प्रोत्साहन भत्ताबापत पाउने रकम बढाइने भएको छ ।
गृहमन्त्री सुधन गुरुङको अध्यक्षतामा बसेको राष्ट्रिय विपद् जोखिम न्यूनीकरण तथा व्यवस्थापन प्राधिकरणको कार्यकारी समितिको आजको बैठकले बाढी, पहिरो र आगलागीजस्ता प्राकृतिक विपद्का बेला ज्यान जोखिममा राखेर उद्धार तथा राहत कार्यमा खटिने सुरक्षाकर्मीको प्रोत्साहन भत्ता तथा दैनिक खाजा खर्चबापत पाउने रकम बढाउने निर्णय गरेको हो ।
विपद्को समयमा आफ्नै जीवनलाई बाजी राखेर अग्रपङ्क्तिमा खटिने नेपाल प्रहरी, सशस्त्र प्रहरी बल र नेपाली सेनाका जनशक्तिको उच्च योगदानलाई कदर गर्दै सरकारद्वारा यो कदम चालिएको प्राधिकरणले जनाएको छ । विपद् व्यवस्थापनलाई अझ प्रभावकारी, द्रुत र परिणाममुखी बनाउन अग्रपङ्क्तिमा खटिने टोलीलाई राज्यका तर्फबाट सम्मान र प्रोत्साहनको अनुभूति गराउनु अपरिहार्य भएकाले सरकारले यो सुविधा परिमार्जन गरेको जनाइएको छ ।
प्राधिकरणको कार्यकारी समितिको बैठकले सुरक्षाकर्मीले पाउने प्रोत्साहन रकम बढाउने विषयमा सम्बन्धित निकायलाई पत्राचार गर्नेछ । सोही निर्णयका आधारमा सम्बन्धित सुरक्षा निकायहले तालुकदार मन्त्रालयमा लेखिपठाउनु पर्नेछ र सम्बन्धित मन्त्रालयले यसबारे निर्णय गर्ने जनाइएको छ ।
बैठकमा सुरक्षाकर्मीलाई दैनिक खाना र खाजा खर्चबापत रु एक हजार र एक दिनको तलबको ५० प्रतिशत बराबरको रकम प्रोत्साहन भत्ताबापत दिने विषयमा छलफल भएको थियो ।
