काठमाडौँ। तीन दिनदेखि सुरुङभित्र फसेकाहरूको उद्धारमा नेपाली जनशक्ति र स्रोतसाधनबाट मात्रै कठिनाइ भएपछि सरकारले विदेशी उद्धार टोलीलाई नेपाल आउन अनुमति दिएको छ ।
नेपालको पूर्ववत् अडान परिवर्तन गर्दै पहिलो विदेशी विशेषज्ञ टोलीका रूपमा भारतबाट ‘सुरुङ उद्धार टोली’ शुक्रबार राति नेपाल आइपुगेको हो । भारतीय विदेशमन्त्री एस जयशङ्करका अनुसार ११ सदस्यीय चिकित्सा तथा सुरुङ उद्धार टोली राहत सामग्रीसहित घटनास्थल पुगिसकेको छ ।
तेस्रो चरणको राहत तथा उद्धार सामग्री लिएर आएको भारतीय सेनाको विमानमार्फत टोली नेपाल आएको हो । टोलीले सुरुङमा फसेकाको उद्धारमा नेपाली सुरक्षाकर्मीलाई प्राविधिक सहयोग गर्नुका साथै आफ्नो विशेषज्ञता प्रयोग गर्नेछ ।
भारतले यसअघि दुई चरणमा १० टन र ३७.५ टन राहत सामग्री पठाइसकेको छ । तेस्रो चरणमा थप १० टनसहित भारतले नेपाललाई हालसम्म ५७.५ टन राहत सामग्री उपलब्ध गराएको छ । पछिल्लो सामग्रीमा पोर्टेबल जेनेरेटर, अत्यावश्यक सामग्री, खाद्य प्याकेट र पानी शुद्धीकरण गर्ने चक्की छन् ।
यसअघि शुक्रबार परराष्ट्र मन्त्रालयका प्रवक्ता लोकबहादुर क्षेत्रीले नेपाली सुरक्षा निकाय नै खोज तथा उद्धारमा सक्रिय रहेकाले तत्काल विदेशी सहयोग आवश्यक नरहेको बताउनुभएको थियो ।
तर तीन दिनदेखि सुरुङलगायत विभिन्न स्थानमा मानिस फसेको र केही व्यक्ति जीवितै रहेको सूचना सार्वजनिक भएपछि नेपाल सरकारले पहिलोपटक विदेशी विशेषज्ञ उद्धारकर्तालाई प्रत्यक्ष उद्धारमा सहभागी हुन अनुमति दिएको हो ।
