काठमाडौं । यामाहा ब्लू स्ट्रीक्स मोटरसाइकल कम्युनिटीले रसुवा र नुवाकोटका बाढी प्रभावित परिवारलाई राहत सामग्री सहयोग गरेको छ ।
कम्युनिटीका सदस्यहरूले बाढी प्रभावितका लागि ९३ हजार रुपैयाँ संकलन गरी चामल, दाल, मिनरल वाटर र स्यानिटरी प्याडलगायत आवश्यक सामग्री खरिद गरेका थिए ।
संकलित सामग्री नुवाकोटको श्री सुन्दरी केउरिनी माध्यमिक विद्यालयमा स्थापना गरिएको अस्थायी होल्डिङ सेन्टरमा वितरण गरिएको थियो । ब्लू स्ट्रीक्सका सदस्यहरूले प्रभावित परिवार, विशेषगरी ज्येष्ठ नागरिक र बालबालिकासँग प्रत्यक्ष भेट गरी राहत सामग्री हस्तान्तरण गरेका थिए ।
एमएडब्ल्यू राइड्स प्रालिका कार्यकारी निर्देशक तथा प्रमुख कार्यकारी अधिकृत दीपक कुमार अग्रवालले ब्लू स्ट्रीक्सका सदस्यहरू मोटरसाइकल राइडमा मात्र सीमित नरही सामाजिक सेवामा समेत सक्रिय रहेको बताए ।
उनले नेपालभर सञ्चालन भइरहेका संस्थाका सामाजिक उत्तरदायित्वका गतिविधिसँगै विपद्का समयमा पनि प्रभावित नागरिकको साथमा उभिने प्रतिबद्धता व्यक्त गरे । उनका अनुसार ‘राइड टू प्राइड’ ब्लू स्ट्रीक्सको मूल मन्त्रका रूपमा अघि बढिरहेको छ ।
