काठमाडौं। रेड बुलको मूल कम्पनी तथा नेपालमा रहेको सरस बेभरेजेजको संयुक्त लगानी साझेदार टीसीपी ग्रुपले नेपालका बाढीपहिरो प्रभावितका लागि १० लाख थाई भाट सहयोग गरेको छ।
टीसीपी ग्रुपले थाई रेडक्रस सोसाइटीमार्फत नेपालमा हालै आएको आकस्मिक बाढी तथा पहिरोबाट प्रभावित समुदायको राहत तथा सहयोगका लागि उक्त रकम प्रदान गरेको हो। टीसीपी ग्रुपको तर्फबाट अन्तर्राष्ट्रिय व्यापार निर्देशक एन्ड्रास डोनाउर र कर्पोरेट मामिला तथा सञ्चार निर्देशक अजार्री सुवाङ्गुलले थाई रेडक्रस सोसाइटीलाई सहयोग रकम हस्तान्तरण गरे। उक्त सहयोग थाई रेडक्रस सोसाइटीको कोष संकलन ब्युरोका निर्देशक खान प्राचुआबमोह र उपनिर्देशक जानप्रापा विचित्चोल्चाईले ग्रहण गरेका थिए।
टीसीपी ग्रुपले नेपालमा सरस बेभरेजेजमार्फत लामो समयदेखि आफ्नो उपस्थिति जनाउँदै आएको छ। सरस बेभरेजेजले नेपालमा रेड बुल उत्पादन तथा वितरण गर्दै आएको छ। नेपालको अमरापुरीस्थित सरस बेभरेजेजको उत्पादन केन्द्रबाट घरेलु बजारका लागि रेड बुल उत्पादन हुँदै आएको छ। नेपालमा टीसीपी ग्रुपको उपस्थिति उत्पादन, रोजगारी तथा लगानीका क्षेत्रमा समेत रहेको कम्पनीले जनाएको छ।
टीसीपी ग्रुपले पछिल्लो सहयोगमार्फत विपद्बाट प्रभावित नेपाली समुदाय र जारी राहत तथा उद्धार प्रयासमा आफ्नो समर्थन जनाएको हो।
