काठमाडौं । लगातारको वर्षाका कारण बाढीपहिरोको जोखिम बढेपछि सरकारले मध्य तथा पश्चिम नेपालका २५ जिल्लामा दुई दिन सवारी आवागमन बन्द गर्ने निर्णय गरेको छ ।
मनसुन प्रतिकार्य कमान्ड पोस्टको शुक्रबार बसेको बैठकले धेरै वर्षा भएका तथा आगामी दिनमा समेत भारी वर्षा हुन सक्ने आकलन गरिएका २५ जिल्लालाई रेडअलर्टमा राख्दै शुक्रबार र शनिबार सवारी आवागमन बन्द गर्ने निर्णय गरेको हो । निर्णय कार्यान्वयनका लागि राष्ट्रिय विपद् जोखिम न्यूनीकरण तथा व्यवस्थापन प्राधिकरणले सम्बन्धित जिल्ला मनसुन प्रतिकार्य कमान्ड पोस्टलाई परिपत्र गरेको छ ।
केन्द्रमा गृह मन्त्रालय र विपद् प्राधिकरणसहितका सम्बन्धित निकाय सहभागी मनसुन प्रतिकार्य कमान्ड पोस्ट रहेको छ । जिल्लामा भने प्रमुख जिल्ला अधिकारीको नेतृत्वमा जिल्ला मनसुन प्रतिकार्य कमान्ड पोस्ट गठन गरिएको छ ।
रेडअलर्टमा राखिएका जिल्लामा शुक्रबार र शनिबार सवारी आवागमन बन्द गरिएको छ । तराईतर्फ रुपन्देही, कपिलवस्तु, बाँके, बर्दिया, कैलाली र कञ्चनपुरलाई रेडअलर्टमा राखिएको छ ।
त्यस्तै, पाल्पा, अर्घाखाँची, गुल्मी, स्याङ्जा, प्युठान, दाङ र सुर्खेतमा पनि सवारी आवागमन रोकिएको छ । उच्च पहाडी तथा हिमाली जिल्लातर्फ गोरखा, लमजुङ, मनाङ, मुस्ताङ, डोल्पा, जुम्ला, कालीकोट, मुगु, हुम्ला, बझाङ, बाजुरा र दार्चुलामा समेत यातायात बन्द गरिएको छ ।
पहेँलो अलर्टमा रहेका जिल्लामा भने रातिको समयमा सवारीसाधन सञ्चालनमा रोक लगाउन निर्देशन दिइएको छ । दिउँसोको समयमा भने स्थानीय अवस्थाको मूल्यांकन गरेर आवश्यक निर्णय लिन जिल्ला कमान्ड पोस्टलाई भनिएको छ ।
राष्ट्रिय विपद् जोखिम न्यूनीकरण तथा व्यवस्थापन प्राधिकरणका भूगर्भविद् प्रकाश पोख्रेलका अनुसार निरन्तर वर्षा भइरहेको र शनिबार पनि ठूलो पानी पर्ने सम्भावना रहेका जिल्लामा बाढी तथा पहिरोको जोखिमलाई ध्यानमा राखेर सवारी आवागमन रोक्ने निर्णय गरिएको हो ।
लगातारको वर्षाका कारण सडक तथा राजमार्गमा पहिरो खस्ने, सडक अवरुद्ध हुने र नदी तथा खोलामा पानीको बहाव बढ्ने जोखिम रहेको भन्दै जोखिमयुक्त क्षेत्रमा यातायात सञ्चालन रोकिएको हो ।
नेपाल मौसम विज्ञान विभागका अनुसार पश्चिम नेपालका विभिन्न क्षेत्रमा शनिबार र आइतबार पनि भारी वर्षाको सम्भावना छ । वर्षा अझै जारी रहने पूर्वानुमानसँगै बाढीपहिरोको जोखिम भएका क्षेत्रमा सतर्कता बढाइएको छ ।
प्रशासनले जोखिमयुक्त क्षेत्रमा अनावश्यक यात्रा नगर्न, स्थानीय प्रशासन तथा सुरक्षा निकायको सूचना पालना गर्न र सुरक्षित स्थानमा रहन सर्वसाधारणलाई आग्रह गरेको छ ।
