शनिबार गण्डकी, लुम्बिनी, कर्णाली र सुदूरपश्चिमका थोरै स्थानमा भारीदेखि धेरै भारी वर्षा हुने सम्भावना छ। कोशी र बागमतीका एक-दुई स्थानमा भारी वर्षा हुन सक्नेछ। शनिबार राति बागमती, गण्डकी, लुम्बिनी, कर्णाली र सुदूरपश्चिमका केही स्थानमा भारीदेखि धेरै भारी वर्षा तथा लुम्बिनी र सुदूरपश्चिमका एक-दुई स्थानमा अति भारी वर्षाको सम्भावना रहेको छ।

आइतबार पनि गण्डकी, लुम्बिनी, कर्णाली र सुदूरपश्चिमका हिमाली तथा पहाडी भू-भागका धेरै स्थानमा मेघगर्जन र चट्याङसहित मध्यम वर्षा हुने अनुमान गरिएको छ। ती प्रदेशका थोरै स्थानमा भारी वर्षा हुन सक्नेछ भने बागमतीका एक-दुई स्थानमा समेत भारी वर्षाको सम्भावना छ। लुम्बिनी र सुदूरपश्चिमका तराई भू-भागका थोरै स्थानमा हावाहुरी चल्न सक्नेछ।

सोमबारदेखि भने वर्षाको मात्रा घट्ने देखिएको छ। देशभर आंशिक बदली रहने तथा हिमाली र पहाडी भू-भागका थोरै स्थानमा मेघगर्जन र चट्याङसहित मध्यम वर्षा तथा हिमपातको सम्भावना छ।

सोमबार राति तराई भू-भागमा मौसम मुख्यतया सफा रहनेछ। महाशाखाले भारी वर्षाको सम्भावना रहेका क्षेत्रमा गेग्रान बहाव, बाढी, पहिरो तथा भू-क्षयको जोखिम रहने भन्दै सतर्कता अपनाउन आग्रह गरेको छ। वर्षाका कारण सडक तथा हवाई यातायात, कृषि र पर्यटन क्षेत्रमा असर पर्न सक्ने भएकाले पछिल्लो सूचनामा ध्यान दिन अनुरोध गरिएको छ।