मुम्बई। अजय देवगन अभिनित फिल्म ‘दृश्यम ३’ ले प्रदर्शनको चौथो दिनमै विश्वव्यापी रूपमा ३०० करोड भारतीय रुपैयाँभन्दा बढीको कमाइ गरेको छ। शुक्रबार रिलिज भएको यस फिल्मले आफ्नो ओपनिङ विकेन्डमा उत्कृष्ट प्रदर्शन गर्दै व्यापारिक सफलता हासिल गरेको छ।
फिल्मले सोमबार भारतमा २१ करोड रुपैयाँको खुद सङ्कलन गरेको छ। आइतबारको ६१ करोड रुपैयाँको तुलनामा सोमबारको कमाइमा केही गिरावट आए पनि फिल्मको बक्स अफिस पकड बलियो देखिएको छ। यससँगै भारतमा फिल्मको कुल खुद सङ्कलन १९७.५० करोड रुपैयाँ र घरेलु ग्रस सङ्कलन २३७ करोड रुपैयाँ पुगेको छ। विदेशबाट प्राप्त ५ करोड रुपैयाँसहित फिल्मको विश्वव्यापी ग्रस सङ्कलन ३०३ करोड रुपैयाँ पुगेको हो।
अभिषेक पाठकद्वारा निर्देशित यस फिल्मले मोहनलालको मूल मलयालम फिल्म ‘दृश्यम ३’ को २३७.७० करोड रुपैयाँको लाइफटाइम वर्ल्डवाइड सङ्कलनलाई समेत उछिनेको छ। फिल्ममा अजय देवगनका साथै तब्बु, श्रीया सरन, रजत कपुर र इशिता दत्ताको मुख्य भूमिका रहेको छ भने जयदीप अहलावत र प्रकाश राज नयाँ कलाकारका रूपमा थपिएका छन्।
सोमबार फिल्मको समग्र हिन्दी अक्युप्यान्सी २४.७१ प्रतिशत रहेको थियो, जसमा रात्रिकालीन शोहरूमा दर्शकको उपस्थिति ३८.३८ प्रतिशतसम्म पुगेको थियो। ‘दृश्यम ३’ अब ‘मिर्जापुर: द मुभी’ को ३३४.६८ करोड रुपैयाँको रेकर्ड तोड्नका लागि थप ३१.६८ करोड रुपैयाँको दूरीमा रहेको छ। यो फिल्म अजय देवगनको सर्वाधिक कमाइ गर्ने फिल्म ‘तान्हाजी: द अनसङ वारियर’ को ३६१ करोड रुपैयाँको रेकर्ड तोड्ने दिशामा अघि बढेको छ।
