काठमाडौं । सर्वोत्तम सिमेन्ट लिमिटेडले सेयरधनीलाई २१ प्रतिशत लाभांश वितरण गर्ने प्रस्ताव गरेको छ। कम्पनीले आर्थिक वर्ष २०८२/८३ को मुनाफाबाट १५ प्रतिशत नगद लाभांश र ६ प्रतिशत बोनस सेयर दिने प्रस्ताव गरेको हो।
कम्पनीको हाल कायम चुक्ता पुँजी ५ अर्ब २२ करोड ४२ लाख ७५ हजार रुपैयाँका आधारमा ७८ करोड ३६ लाख ४१ हजार २५० रुपैयाँ नगद लाभांश र ३१ करोड ३४ लाख ५६ हजार ५०० रुपैयाँ बराबरको बोनस सेयर वितरण गरिनेछ। नगद लाभांशमा लाग्ने करसमेत समावेश गरिएको कम्पनीले जनाएको छ।
प्रस्तावित लाभांश पारित गर्न कम्पनीले आगामी पुस २ गते वार्षिक साधारणसभा बोलाएको छ। साधारणसभा तथा लाभांश वितरण प्रयोजनका लागि मंसिर १८ गते सेयरधनी दर्ता किताब बन्द गरिने कम्पनीले जनाएको छ। यसअनुसार मंसिर १७ गतेसम्म नेप्सेमा कारोबार भई सेयर नामसारी भएका सेयरधनीले मात्र लाभांश प्राप्त गर्न र साधारणसभामा सहभागी हुन पाउनेछन्।
साधारणसभामा कम्पनीको अधिकृत पुँजी बढाएर ६ अर्ब रुपैयाँ पुर्याउने प्रस्ताव पनि पेस हुनेछ। बोनस सेयर वितरणपछि चुक्ता पुँजीमा हुने वृद्धिअनुसार प्रबन्धपत्र संशोधन गर्ने तथा सञ्चालक समितिमा पाँच जना सञ्चालक कायम गर्ने प्रस्तावसमेत सभाको कार्यसूचीमा छ।
त्यस्तै, सञ्चालकहरूको सञ्चार तथा पत्रपत्रिका सुविधा, बैठक भत्ता र उपसमिति बैठक भत्तामा संशोधन गर्ने प्रस्ताव पनि पेस गरिनेछ। नियामक निकायबाट निर्देशन आएमा प्रबन्धपत्र तथा नियमावली संशोधन गर्न सञ्चालक समितिलाई अख्तियारी दिने प्रस्तावसमेत सभामा लगिने कम्पनीले जनाएको छ।
साधारणसभाले आर्थिक वर्ष २०८२/८३ को वार्षिक प्रतिवेदन, लेखापरीक्षकको प्रतिवेदनसहितका वित्तीय विवरण पारित गर्नेछ। साथै, आगामी आर्थिक वर्षका लागि लेखापरीक्षक नियुक्ति तथा पारिश्रमिक निर्धारण गर्ने र कम्पनी ऐनअनुसार भएका कारोबार अनुमोदन गर्ने प्रस्ताव पनि सभामा पेस हुनेछ।
