रुकुमपश्चिम- रुकुमपश्चिममा भौगोलिक रुपले ठुलो र दुर्गम मानिएको आठबिसकोटमा राष्ट्रिय वाणिज्य बैंकले सेवा सञ्चालन गरेको छ । बैंकको ३१२ औँ शाखा कार्यालय स्थापना गरेर सोमबारबाटै सेवा सुरु गरेको बैंकले जनाएको छ ।
आठबिसकोट नगरपालिका –९ को राडीबजारमा स्थापना भएको शाखाबाट सबै प्रकारका सेवाहरु प्रदान हुने बैंकका मुसीकोट शाखा प्रमुख हेमन्तराज न्यौपानेले जानकारी दिनुभयो । उहाँका अनुसार खाता खोल्ने, रकम निकाल्ने, जम्मा गर्नेदेखि चेक क्लियरिङ, पेन्सन, सामाजिक सुरक्षा भत्ता, राजस्व, इबैंकिङ्, सरकारी कारोबार, रेमिटेन्स, ऋण लगानी लगायतका सेवाहरु शाखाबाट प्रवाह हुनेछन् ।
२०२२ साल माघ १० गते स्थापना भएको यो बैंक सरकारको पूर्ण स्वामित्वमा रहेको एक मात्र बैंक हो । देशका ७७ वटै जिल्लामा सेवा दिइरहेको यस बैंकले रुकुमपश्चिमको चौरजहारी र मुसीकोटमा शाखा कार्यालय र सोलाबाङमा एक्सटेन्सन काउन्टरमार्फत सेवा दिइरहेको छ ।
दुर्गम मानिएको स्थानमै राष्ट्रिय वाणिज्य बैंकको कारोबार सेवा सुरु भएपछि यहाँका स्थानीय खुशी भएका छन् । आठबिसकोट नगरप्रमुख रवि केसीले अबदेखि यहाँका नागरिकले सहज रुपमा बैंङ्किङ सेवा पाउने विश्वास व्यक्त गर्नुभयो । सरकारी बैंकमा हुने कारोबारका लागि जिल्ला सदरमुकाम जानुपर्ने बाध्यता हटेर गएको उहाँको भनाइ छ ।
भौगोलिक र जनसङ्ख्याको हिसाबले जिल्लाको ठुलो नगरपालिकामा दुई वर्षको लगातारको माग तथा पहलकदमीपछि राष्ट्रिय वाणिज्य बैंकले शाखा कार्यालयमार्फत सेवा सुचारु गरेको उहाँले उल्लेख गर्नुभयो । नगर प्रमुख केसीले पालिकाको दुर्गममा रहेका वडाहरु १, २, ३, ४, ५ र ६ को लागि अलग अलग दुई वटा काउन्टरको समेत माग गरेको बताउनुभयो । ती वडाहरुबाट पालिकाको केन्द्रमा सेवा लिन आउनलाई दुई दिन लाग्ने गर्दछ । यसअघि राडी बजारमा प्रभु, एनएमबी लगायतका अन्य बैंकले सेवा सञ्चालन गरेका छन् । तर बैंकमा हुने भिडभाडका कारण दिनभर लाइनमा बस्नुपर्ने बाध्यतामा स्थानीय छन् ।
