नेपाल सरकारले सशस्त्र प्रहरी बल (एपीएफ), नेपालका लागि नयाँ तलबमान स्वीकृत गरेको छ । अर्थ मन्त्रालयद्वारा जारी गरिएको परिपत्रअनुसार सशस्त्र प्रहरीका सबै दर्जाको तलबमा परिमार्जन गरिएको हो ।
सार्वजनिक गरिएको नयाँ सूचीअनुसार सशस्त्र प्रहरी महानिरीक्षक (आईजीपी) र सशस्त्र प्रहरी अतिरिक्त महानिरीक्षक (एआईजीपी) को कुल तलब (कायम जम्मा) ८४ हजार ५ सय ७६ रुपैयाँ पुगेको छ । त्यस्तै, सशस्त्र प्रहरी नायब महानिरीक्षक (डीआईजी) को तलब ७३ हजार ७ सय ५० र सशस्त्र प्रहरी वरिष्ठ उपरीक्षक (एसएसपी) को ७० हजार ७ सय ९४ रुपैयाँ कायम भएको छ ।
सशस्त्र प्रहरी निरीक्षक (इन्स्पेक्टर) को कुल तलब ६० हजार ८ सय ७४ रुपैयाँ तोकिएको छ । जुनियर अधिकृततर्फ सशस्त्र प्रहरी वरिष्ठ नायब निरीक्षकको ४८ हजार १ सय ४ र नायब निरीक्षकको ४५ हजार ८ सय ४१ रुपैयाँ पुगेको छ ।
नयाँ तलबमान अनुसार सशस्त्र प्रहरी जवानको कुल तलब ३६ हजार ३ सय ३८ रुपैयाँ कायम गरिएको छ । सशस्त्र प्रहरी हबल्दारको ३७ हजार ४ सय ५७ र सहायक हबल्दारको ३७ हजार १ रुपैयाँ पुगेको छ । श्रेणी विहीन रिक्रुटको तलब २७ हजार १ सय ७२ रुपैयाँ छ भने फलोवर्स (सयस समेत) को कुल तलब ३६ हजार २ सय ३२ रुपैयाँ पुगेको छ ।
सशस्त्र प्रहरी कार्यालय सहयोगीहरूको हकमा पाँचौँ स्तरको कुल तलब ४० हजार ९ सय ६२ र प्रथम स्तरको २८ हजार ९ सय ८४ रुपैयाँ कायम भएको छ ।
सरकारको यो निर्णयसँगै सशस्त्र प्रहरी बलमा कार्यरत हजारौँ सुरक्षाकर्मीहरूले साउन महिनादेखि नै वृद्धि भएको नयाँ तलब प्राप्त गर्नेछन् । यो कायम गरिएको जम्मा रकममा ग्रेड र प्रचलित भत्ताहरू समेत समावेश गरिएको छ ।
