काठमाडौं । चाडपर्व नजिकिँदै जाँदा नेपाली बजारमा खानेतेलको मूल्य बढेको छ। विशेषगरी तोरी र सूर्यमुखी तेलको मूल्य उकालो लागेपछि उपभोक्तामाथि थप आर्थिक भार परेको छ।
बजारमा उपलब्ध मूल्यअनुसार काँचो तोरीको तेल प्रतिलिटर ३५० देखि ३८० रुपैयाँसम्म बिक्री भइरहेको छ। त्यस्तै भुटेको तोरीको तेल प्रतिलिटर ४३० देखि ४६० रुपैयाँसम्म पुगेको छ। नेपाल खुद्रा व्यापार संघ तथा विभिन्न अनलाइन बिक्री प्लेटफर्मका अनुसार ब्रान्ड र गुणस्तरअनुसार मूल्यमा केही फरक देखिएको छ।
त्यसैगरी सूर्यमुखी तेलको मूल्य प्रतिलिटर २७५ देखि ३०० रुपैयाँसम्म कायम छ। खुद्रा पसलहरूमा अधिकांश ब्रान्डको मूल्य २९० देखि ३०० रुपैयाँसम्म रहेको छ भने खाद्य व्यवस्था तथा व्यापार कम्पनीले प्रतिलिटर २७५ रुपैयाँमै उपलब्ध गराइरहेको छ।
बजारमा बिक्री हुने सनफ्लोर, धारा, अमृत लगायतका एक लिटर प्याकका सूर्यमुखी तेल विभिन्न अनलाइन स्टोरमा २७५ देखि २९० रुपैयाँसम्ममा बिक्री भइरहेको छ।
खाद्यवस्तुको मूल्य निरन्तर बढ्दै गएपछि उपभोक्ताले दैनिक उपभोग्य सामग्रीको खर्च धान्न कठिन भएको गुनासो गर्दै आएका छन्। संघीय संसदमा समेत सांसदहरूले अत्यावश्यक उपभोग्य वस्तुको मूल्यवृद्धि नियन्त्रण गर्न सरकारको ध्यानाकर्षण गराउँदै आएका छन्।
उपभोक्ता अधिकारकर्मीहरूले चाडपर्वको अवसरमा कृत्रिम अभाव, कालोबजारी र अस्वाभाविक मूल्यवृद्धि रोक्न बजार अनुगमन प्रभावकारी बनाउन सरकारसँग माग गरेका छन्।
