सिन्धुपाल्चोक। सिन्धुपाल्चोकको भोटेकोशी गाउँपालिका–३ स्थित तातोपानी भन्सार क्षेत्रमा शुक्रबार बिहान खसेको सुख्खा पहिरोले सशस्त्र प्रहरी बल नेपाल बोर्डर आउट पोस्ट (बीओपी) तातोपानीका विभिन्न संरचनामा क्षति पुगेको छ।
सशस्त्र प्रहरीका अनुसार बिहान १ः१५ बजे बीओपीको उत्तर–पश्चिमतर्फ रहेको करिब २०० देखि ३०० मिटर अग्लो डाँडाबाट सुख्खा पहिरो खसेको थियो। पहिरोसँगै झरेका ढुंगाहरू उछिट्टिएर बीओपी परिसरका भवन तथा अन्य संरचनामा ठोक्किँदा क्षति पुगेको हो।
घटनामा कुनै मानवीय क्षति भने भएको छैन।पहिरोका कारण पहिलो लाइन ब्यारेकको एउटा झ्यालको सिसा फुटेको, दोस्रो लाइन ब्यारेकको भित्ता र जस्ताको छानोमा क्षति पुगेको तथा एउटा ड्युटी पोस्ट पूर्ण रूपमा र अर्को ड्युटी पोस्ट आंशिक रूपमा क्षतिग्रस्त भएको सशस्त्र प्रहरीले जनाएको छ।
त्यसैगरी सशस्त्र प्रहरी निरीक्षकको बाथरुम, जिन्सी स्टोर भवन, राष्ट्रिय झण्डाको पोल, मुख्य गेटअगाडिको सिँढीलगायत संरचनामा पनि क्षति पुगेको छ। प्रहरीले क्षतिको विवरण संकलन तथा आवश्यक मर्मतको प्रक्रिया अघि बढाएको जनाएको छ।
