काठमाडौं । गोल्छा ग्रुपअन्तर्गतको हुलास फिनसर्भ हायर पर्चेजले गत आर्थिक वर्षमा ३९ करोड ८७ लाख २३ हजार रुपैयाँ खुद नाफा आर्जन गरेको छ । कम्पनीले सार्वजनिक गरेको चौथो त्रैमाससम्मको अपरिष्कृत वित्तीय विवरणअनुसार अघिल्लो आर्थिक वर्षको २१ करोड ६१ लाख ६९ हजार रुपैयाँको तुलनामा नाफा ८४.४५ प्रतिशतले बढेको हो ।
कम्पनीको व्यवसाय विस्तारसँगै खुद ब्याज आम्दानी र कर्जा प्रवाहमा वृद्धि भएपछि नाफामा सुधार आएको हो । गत आर्थिक वर्षमा कम्पनीको खुद ब्याज आम्दानी २२ करोड १० लाख रुपैयाँबाट बढेर ४८ करोड २३ लाख रुपैयाँ पुगेको छ ।
त्यस्तै, कम्पनीको कुल कर्जा प्रवाह ८ अर्ब २ करोड ५५ लाख रुपैयाँबाट बढेर १२ अर्ब २१ करोड ८५ लाख रुपैयाँ पुगेको छ । एक वर्षको अवधिमा कर्जा प्रवाह करिब ५२ प्रतिशतले बढेको कम्पनीको वित्तीय विवरणले देखाएको छ ।
आर्थिक क्षेत्रमा चुनौती र तरलता संकुचनका बाबजुद कम्पनीले निष्क्रिय कर्जा अनुपातसमेत घटाएको छ । अघिल्लो आर्थिक वर्षमा ३.४० प्रतिशत रहेको निष्क्रिय कर्जा अनुपात गत आर्थिक वर्षमा घटेर १.८७ प्रतिशतमा झरेको छ ।
कम्पनीले अन्डरराइटिङ मापदण्डमा गरिएको कडाइ र सुरुवाती चरणमै अपनाइएको असुली रणनीतिका कारण निष्क्रिय कर्जा घटाउन सफल भएको जनाएको छ ।
प्रतिसेयर आम्दानी ४८ रुपैयाँ नाघ्यो
नाफा बढेसँगै कम्पनीको प्रतिसेयर आम्दानी पनि उल्लेख्य रूपमा वृद्धि भएको छ । अघिल्लो आर्थिक वर्षको अन्त्यमा २६.०४ रुपैयाँ रहेको प्रतिसेयर आम्दानी गत आर्थिक वर्षमा बढेर ४८.०४ रुपैयाँ पुगेको छ ।
कम्पनीको प्रतिसेयर नेटवर्थ २२७.४६ रुपैयाँ रहेको छ । त्यस्तै, रिटर्न अन इक्विटी २१.१२ प्रतिशत, कस्ट अफ फन्ड ५.७७ प्रतिशत र ब्याजदर स्प्रेड ३.३९ प्रतिशत रहेको वित्तीय विवरणमा उल्लेख छ ।
असार मसान्तसम्म कम्पनीको साधारण जगेडा कोषमा २८ करोड ३९ लाख रुपैयाँ रहेको छ ।
गत आर्थिक वर्षको नाफा र अघिल्ला वर्षहरूको सञ्चित मुनाफासमेत जोड्दा कम्पनीको वितरणयोग्य नाफा ७७ करोड ४० लाख रुपैयाँ पुगेको छ । यस आधारमा कम्पनीले करिब ९३ प्रतिशतसम्म लाभांश वितरण गर्न सक्ने अवस्था रहेको जनाइएको छ ।
२० लाख कित्ता बढी आईपीओ ल्याउने तयारी
नेपाल राष्ट्र बैंकबाट इजाजतपत्र प्राप्त हायर पर्चेज कर्जा प्रदायक हुलास फिनसर्भले सन् २०१२ देखि हायर पर्चेज सेवा दिँदै आएको छ । कम्पनीले बुक बिल्डिङ विधिमार्फत २० लाख ७५ हजार कित्ता प्राथमिक सेयर निष्कासन गर्ने तयारी गरिरहेको छ ।
आईपीओ निष्कासनका लागि कम्पनीले दुई वर्षअघि नै एनएमबी क्यापिटललाई निष्काशन तथा बिक्री प्रबन्धक नियुक्त गरिसकेको छ । कम्पनीको हालको चुक्ता पुँजी ८३ करोड रुपैयाँ रहेको छ ।
गोल्छा ग्रुपअन्तर्गतको कम्पनीले ‘इन्स्टा फाइनान्स’ सेवामार्फत दुईपाङ्ग्रे, तीनपाङ्ग्रे तथा चारपाङ्ग्रे सवारीसाधनका साथै मोबाइल फोन, उपभोक्ता इलेक्ट्रोनिक्स, ल्यापटप र फर्निचर खरिदका लागि उपभोक्ता वित्तीय सेवा उपलब्ध गराउँदै आएको छ ।
कम्पनीले प्रतिस्पर्धात्मक ब्याजदर र लचिलो किस्ता सुविधामार्फत ग्राहकको खरिद प्रक्रियालाई सहज बनाउने रणनीति लिएको जनाएको छ ।
सन् २०१२ मा हुलास इन्भेस्टमेन्ट कम्पनीका रूपमा स्थापना भएको संस्था सन् २०२१ मा हुलास फिनसर्भका रूपमा नाम परिवर्तन गरिएको थियो । सन् २०२३ नोभेम्बरदेखि कम्पनीको नाम ‘हुलास फिनसर्भ हायर पर्चेज’ कायम गरिएको हो ।
कम्पनीको स्वामित्वमा हंशराज हुलासचन्द एन्ड कम्पनी प्रालिको ८५ प्रतिशत हिस्सा रहेको छ । बाँकी १५ प्रतिशत सेयर हुलास अटोक्राफ्ट, हिम इलेक्ट्रोनिक्सलगायत ६ जना सेयरधनीको स्वामित्वमा रहेको छ ।
कम्पनीको अध्यक्ष तथा प्रबन्ध निर्देशकमा शेखर गोल्छा रहेका छन् ।
