काठमाडौं । दुबईको सुगन्धित उत्पादन ब्रान्ड जमजम पर्फ्युम्सले नेपालमा आफ्नो पहिलो आधिकारिक आउटलेट सञ्चालनमा ल्याउने भएको छ । कम्पनीले काठमाडौंको सुन्धारास्थित सिभिल मलको पसल नम्बर १०१ मा स्थापना गरेको आउटलेट शनिबार मध्याह्न १२ बजे उद्घाटन गर्ने जनाएको छ । जमजम पर्फ्युम्स नेपाल प्रालिले उक्त ब्रान्डलाई औपचारिक रूपमा नेपाली बजारमा भित्र्याएको हो ।
आउटलेट उद्घाटनका लागि जमजम ब्रदर्सका नामले सामाजिक सञ्जालमा चर्चित अब्दुल गफुर र मोहम्मद शकुर शुक्रबार काठमाडौं आइपुगेका छन् । उनीहरू क्रमशः बडे भाइ र छोटे भाइका नामले परिचित छन् । दुबईमा व्यवसाय गर्दै आएका पाकिस्तानी मूलका यी दाजुभाइले जमजम इलेक्ट्रोनिक्सबाट सुरु गरेको व्यावसायिक यात्रालाई पछिल्लो समय पर्फ्युम व्यवसायमा विस्तार गरेका हुन् ।
अब्दुल गफुरका अनुसार उनीहरूले पाँच वर्षअघि सामाजिक सञ्जालमा सामग्री निर्माण गर्न थालेका थिए । त्यसको दोस्रो वर्षदेखि नेपाली दर्शक उनीहरूसँग जोडिन थालेका हुन् । नेपाली दर्शकबाट निरन्तर प्राप्त माया र समर्थनप्रति आभार व्यक्त गर्न तथा आपसी भाइचाराको सम्बन्धलाई थप बलियो बनाउन नेपाल आएको उनले बताए ।
नेपाली उपभोक्ताका लागि कुन पर्फ्युम उपयुक्त हुन्छ भन्ने प्रश्नमा उनले नेक्सा प्रो प्रयोग गर्न सुझाव दिएका छन् ।
नेपालमा जमजम पर्फ्युम्सको व्यावसायिक नेतृत्व अध्यक्ष जया प्रसाद भट्टराई (जेपी), निर्देशक विनोद भट्टराई र प्रबन्धक रोशन सिग्देलले गरिरहेका छन् ।
कम्पनीका अनुसार आधिकारिक आउटलेट सञ्चालनमा आएपछि नेपाली उपभोक्ताले दुबईका मौलिक तथा उच्च गुणस्तरीय पर्फ्युम भरपर्दो माध्यमबाट खरिद गर्न सक्नेछन् । जमजमका उत्पादन सिभिल मलस्थित आउटलेटसँगै माईपे र कम्पनीको आधिकारिक नेपाली वेबसाइटमार्फत पनि उपलब्ध हुनेछन् ।
जमजम पर्फ्युम्सले हाल साउदी अरब, पाकिस्तान, कुवेत र ओमानमा गरी २४ वटा आउटलेट सञ्चालन गरिरहेको जनाएको छ । काठमाडौंमा खुल्न लागेको आउटलेट कम्पनीको विश्वव्यापी सञ्जालअन्तर्गत २५औं शाखा हुनेछ ।
अन्तर्राष्ट्रिय बजार विस्तारलाई तीब्र बनाउने योजनाअन्तर्गत कम्पनीले कतार, बेलायत, अमेरिका, स्पेन र मलेसियामा पनि शाखा स्थापना गर्ने तयारी गरिरहेको जनाएको छ ।
