काठमाडौं । त्रिशक्ति सेक्युरिटिज लिमिटेड (ब्रोकर नम्बर ४८) ले आफ्ना ग्राहकका लागि मार्जिन कारोबार सुविधा सुरु गरेको छ । नेपाल धितोपत्र बोर्डबाट अनुमति प्राप्त कम्पनीले प्रचलित नियामकीय व्यवस्था र मार्जिन कारोबार सुविधासम्बन्धी निर्देशिकाअनुसार सेवा सञ्चालनमा ल्याएको जनाएको छ ।
यो सुविधासँगै योग्य लगानीकर्ताले तोकिएको सीमाभित्र मार्जिनमा सेयर कारोबार गर्न सक्नेछन् । सुविधा लिन लगानीकर्ताले कम्पनीले तोकेको मापदण्ड र प्रक्रिया पूरा गर्नुपर्नेछ ।
मार्जिन कारोबार सुविधा लिन इच्छुक ग्राहकले काठमाडौंको पुतलीसडकस्थित मुख्य कार्यालय तथा पोखरा, महेन्द्रनगर, धनगढी, हेटौँडा, बुटवल, बनेपा, ललितपुर र भक्तपुरस्थित शाखाबाट सेवा लिन सक्नेछन् ।
कम्पनीका अनुसार मार्जिन कारोबारमा उपलब्ध हुने ऋणको सीमा, ब्याजदर, योग्य धितोपत्र र न्यूनतम मार्जिनसम्बन्धी विवरण कम्पनीबाट प्राप्त गर्न सकिनेछ ।
कम्पनीका प्रबन्ध सञ्चालक गोविन्द दाहालले लगानीकर्तालाई थप लगानीको अवसर उपलब्ध गराउने र बजारलाई चलायमान बनाउने उद्देश्यले मार्जिन कारोबार सुविधा सुरु गरिएको बताए । कम्पनीले लगानीकर्तामैत्री, पारदर्शी र प्रभावकारी सेवा दिने प्रतिबद्धता जनाएको छ ।
