एजेन्सी । इरान छिट्टै ब्रिक्स राष्ट्रहरूले स्थापना गरेको न्यु डेभलपमेन्ट बैंक (एनडीबी)को सदस्य बन्ने भएको छ । इरानको केन्द्रीय बैंकका गभर्नर अब्दोलनासेर हेम्मतीले भारतमा हुने ब्रिक्स वित्त बैठकअघि इरान एनडीबीमा आबद्ध हुने बताएका हुन् ।
अमेरिका तथा अन्य अन्तर्राष्ट्रिय प्रतिबन्धको सामना गरिरहेको इरानले एनडीबीको सदस्यतालाई वैकल्पिक वित्तीय माध्यमका रूपमा हेरेको छ । अमेरिकी डलरमा निर्भरता घटाउँदै उदीयमान अर्थतन्त्रहरूसँग आर्थिक सम्बन्ध विस्तार गर्ने तेहरानको रणनीति छ ।
तर, एनडीबीले भने इरानको सदस्यताबारे औपचारिक पुष्टि गरिसकेको छैन । बैंकको कर्पोरेट कम्युनिकेसन विभागले रोयटर्सलाई इरानको सदस्यताबारे तत्काल पुष्टि गर्न नसकिने जनाएको छ ।
इरान सन् २०२४ मा ब्रिक्सको विस्तारसँगै समूहको सदस्य बनेको थियो । त्यसयता उसले एनडीबीको सदस्य तथा सेयरधनी बन्ने इच्छा व्यक्त गर्दै आएको थियो ।
ब्राजिल, रुस, भारत, चीन र दक्षिण अफ्रिकाले पूर्वाधार तथा दिगो विकासका आयोजनामा लगानी गर्ने उद्देश्यले सन् २०१५ मा एनडीबी स्थापना गरेका थिए । पछिल्लो समय बैंकले यूएई, इजिप्टलगायतका उदीयमान अर्थतन्त्रलाई पनि सदस्य बनाएको छ । गत जुन ५ मा उज्वेकिस्तान बैंकको १०औँ सदस्य बनेको थियो ।
गभर्नर हेम्मतीका अनुसार ब्रिक्स राष्ट्रहरूबीचको आर्थिक सहकार्यलाई थप बलियो बनाउन एनडीबी महत्वपूर्ण माध्यम बन्न सक्छ । इरानले ब्रिक्स सदस्यहरूसँग राष्ट्रिय मुद्रामै व्यापार गर्ने तथा द्विपक्षीय र त्रिपक्षीय मौद्रिक सहकार्य विस्तार गर्ने प्रयास गरिरहेको उनले बताएका छन् ।
ब्रिक्स राष्ट्रहरूले पछिल्लो समय व्यापार तथा वित्तीय कारोबारमा आफ्नै राष्ट्रिय मुद्राको प्रयोग बढाउँदै अमेरिकी डलरमाथिको निर्भरता घटाउने रणनीति अघि बढाइरहेका छन् ।
एनडीबीको नियमअनुसार संयुक्त राष्ट्रसंघका सदस्य राष्ट्रहरू बैंकको सदस्य बन्न सक्छन् । सदस्य राष्ट्रले बैंकबाट ऋण लिन सक्ने वा सेयरधनीका रूपमा मात्र सहभागी हुन सक्ने व्यवस्था रहेको छ ।
